ಹೈದರಾಬಾದ್: ಜೂಜು ಅಪಾಯಕಾರಿಯಾದರೂ ಅದರ ನಶೆ ಕಡಿಮೆಯಲ್ಲ. ಇದೇ ಜೂಜಿನ ಚಟಕ್ಕೆ ಬಿದ್ದ ವ್ಯಕ್ತಿಯೊಬ್ಬ ಲಕ್ಷವಲ್ಲ ಬರೋಬ್ಬರೀ 100 ಕೋಟಿ ರೂ ಕಳೆದು ಕೊಂಡಿರುವ ಘಟನೆ ನೆರೆಯ ರಾಜ್ಯದಿಂದ ವರದಿ ಆಗಿದೆ. ಆರಂಭದಲ್ಲಿ ಕ್ರಿಕೆಟ್ ಹುಚ್ಚಿನ ಮಜಾಕ್ಕೆ ಈ ಜೂಜಿನ ಮೋಡಿಗೆ ಒಳಗಾದ ಈತ ಬಳಿಕ ಅದನ್ನೇ ಚಟವನ್ನಾಗಿ ಮಾಡಿಕೊಂಡಿದ್ದ 12 ವರ್ಷದಲ್ಲಿ ಬರೋಬ್ಬರಿ 100 ಕೋಟಿ ಹಣ ಕಳೆದುಕೊಂಡಿದ್ದಾನೆ.
ಈ ಕುರಿತು ಹೈದರಾಬಾದ್ ಪೊಲೀಸರು ಮಾಹಿತಿ ನೀಡಿದ್ದು, ಈ ಸಂಬಂಧ ಇಬ್ಬರೂ ಬುಕ್ಕಿ ಮತ್ತು ಕಲೆಕ್ಷನ್ ಏಜೆಂಟ್ ನನ್ನು ಬಂಧಿಸಿದ್ದಾರೆ. ನಗರದಲ್ಲಿ ದೊಡ್ಡ ಮಟ್ಟದಲ್ಲಿ ಈ ಕ್ರಿಕೆಟ್ ಬೆಟ್ಟಿಂಗ್ ನಡೆಯುತ್ತಿದ್ದ ಪ್ರಕರಣಕ್ಕೆ ಸಂಬಂಧಪಟ್ಟಂತೆ ಎಲ್ಬಿ ನಗರ ಸ್ವಾಟ್ ಪೊಲೀಸ್ ಆರೋಪಿಗಳನ್ನು ಬಂಧಿಸಿದ್ದಾರೆ.
ಈ ಪ್ರಕರಣ ಸಂಬಂಧ ಮಾತನಾಡಿರುವ ಪೊಲೀಸರು, ಈ ಬೆಟ್ಟಿಂಗ್ ಭಾಗಿಯಾದರ ಬಂಧನದ ಬಳಿಕ ಅವರ ವಿಚಾರಣೆ ನಡೆಸಿದಾಗ ಈ ಶಾಕಿಂಗ್ ಮಾಹಿತಿಗಳು ಹೊರ ಬಿದ್ದಿವೆ. ಪೊಲೀಸರ ಮಾಹಿತಿ ಪ್ರಕಾರ, ನಗರದ ವನಸ್ಥಲಿಪುರಂನ ರಿಯಲ್ ಎಸ್ಟೇಟ್ ಉದ್ಯಮಿ ಅಶೋಕ ರೆಡ್ಡಿ ಕಡಿಮೆ ಅವಧಿಯಲ್ಲಿ ಹೆಚ್ಚು ಗಳಿಕೆ ಮಾಡಿದ್ದಾನೆ ಎಂಬುದಾಗಿ ತಿಳಿದು ಬಂದಿದೆ.
ಆರಂಭದಲ್ಲಿ ಮಜಾಕ್ಕಾಗಿ ಈತ ಕ್ರಿಕೆಟ್ ಬೆಟ್ಟಿಂಗ್ ಆಡಲು ಮುಂದಾಗಿದ್ದ. ಈ ಬೆಟ್ಟಿಂಗ್ನಲ್ಲಿ ಲಕ್ಷ ಲಕ್ಷ ದುಡ್ಡು ಕಾಣುತ್ತಿದ್ದಂತೆ ಆತ ಪದೇ ಪದೆ ಆಡುತ್ತಾ ಅದನ್ನು ದುಪ್ಪಟ್ಟು ಮಾಡಲು ಮುಂದಾದ. ಇದಾದ ಬಳಿಕ ಈ ಬೆಟ್ಟಿಂಗ್ ದಾಸನಾದ. ಚಟಕ್ಕೆ ಬಿದ್ದ ಮೇಲೆ ಅದರಿಂದ ಹೊರಬಾರಲು ಅಸಾಧ್ಯ ಎಂಬ ಪರಿಸ್ಥಿತಿಗೆ ಬಂದು ತಲುಪಿದ. ಎಷ್ಟೇ ನಷ್ಟ ಅನುಭವಿಸಿದರೂ, ಬೆಟ್ಟಿಂಗ್ ಮಾತ್ರ ತೊರೆಯದೇ ಮುಂದುವರೆಸಿದ. ಇದಕ್ಕಾಗಿ ರಿಯಲ್ ಎಸ್ಟೇಟ್ ಉದ್ಯಮದಲ್ಲಿ ಗಳಿಕೆ ಮಾಡಿದ ಎಲ್ಲ ಹಣವನ್ನು ಬೆಟ್ಟಿಂಗ್ಗೆ ತಂದು ಸುರಿದ. ಇದು ಸಾಲದಾದಾಗ ಈತ ಸಂಬಂಧಿಕರು ಮತ್ತು ಪರಿಚಯಸ್ಥರಿಂದ ಹಣ ಕೇಳಿ ತಂದು ಆಡಲು ಶುರು ಮಾಡಿದ. ಇದೇ ರೀತಿ ಆಡುತ್ತಾ ಆಡುತ್ತಾ ಈತ 12 ವರ್ಷದಲ್ಲಿ ಕಳೆದ ಹಣ ಬರೋಬ್ಬರಿ 100 ಕೋಟಿ ರೂಪಾಯಿಗಳು. ಈ ರೀತಿ ಹಣ ಕಳೆದುಕೊಂಡು ಕಂಪನಿ ನಷ್ಟ ಅನುಭವಿಸಿದ ಕಾರಣ ಇದೀಗ ತನ್ನ ಕಂಪನಿ ದಿವಾಳಿಯಾಗಿದೆ ಎಂದು ಅರ್ಜಿ ಸಲ್ಲಿಸಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಸಾಲಗಾರರ ಕಾಟ, ಕಂಪನಿ ನಷ್ಟ, ಬಿಡಿಗಾಸು ಕೈಯಲ್ಲಿ ಇಲ್ಲದ ಕಾರಣ ಈತ ಕಳೆದ ಕೆಲವು ವರ್ಷಗಳಿಂದ ತಲೆಮರೆಸಿಕೊಂಡಿದ್ದ. ಈ ವೇಳೆ ಹಣಕ್ಕಾಗಿ ಕ್ರಿಕೆಟ್ ಬುಕ್ಕಿಯಾಗಿ ಕೆಲಸ ಮಾಡಿದ್ದಾನೆ. ಆಗಲೂ ಕೂಡ ಕ್ರಿಕೆಟ್ ಬೆಟ್ಟಿಂಗ್ ಚಟ ಆತನಿಂದ ದೂರವಾಗಿಲ್ಲ. ಕೋಟಿ ಕೋಟಿ ಕಳೆದರೂ ಅದರ ಬಗ್ಗೆ ತಲೆ ಕೆಡಿಸಿಕೊಳ್ಳದೇ ಅದೇ ಕಾಯಕವನ್ನು ಮುಂದುವರೆಸಿದ್ದಾನೆ. ಇದೀಗ ಪೊಲೀಸರ ವಶಕ್ಕೆ ಸಿಕ್ಕಿ ಬಿದ್ದಿದ್ದಾನೆ ಎಂದು ರಾಚಕೊಂಡಾ ಕಮಿಷನರ್ ಡಿಎಸ್ ಚೌಹಾಣ್ ತಿಳಿಸಿದ್ದಾರೆ.
ಇದನ್ನೂ ಓದಿ: ಡಾನ್ ಅತೀಕ್ ಅಹ್ಮದ್ ಹತ್ಯೆ: ಮಾದಕ ವ್ಯಸನಿ, ನಿರುದ್ಯೋಗಿಗಳಾಗಿದ್ದ ಶೂಟರ್ಗಳಿಂದ ಹತ್ಯೆ
