अपणुं उत्तराखंडः दिनभरै खास खबर, एक नजर मा

अपणुं उत्तराखंड मा देखा, दिनभरै खास खबर, एक नजर मा

देश मा कोरोना कू प्रकोप कम होंणू नाम नि लेंणू च. पिछला 24 घंटा मा रिकॉर्ड 15968 लौखुं मा संक्रमणे पुष्टि ह्वे गी. जबकि 465 लौखुं मौत ह्वे गी. अब तक देश मा कोरोना संक्रमितों की संख्या 4 लाख 56 हजार का पार पोंछगी. वखि 14476 लौखुं मौत ह्वे गी.

प्रधानमंत्री नरेंद्र मोदी न आज अहम कैबिनेट बैठक करी. जेमा कई अहम फैसलों पर मुहर लगी. बैठक का बाद केंद्रीय मंत्री प्रकाश जावड़ेकर न बते कि बैंकिंग सेक्टर खुंण बड़ा फैसला लिए गिन. जेमा कोऑपरेटिव बैंक अब रिजर्व बैंक का दायरा मा आला. इंका अलावा मुद्रा शिशु लोन पर ब्याज मा द्वी फीसदी छूट दी जाली.

जम्मू-कश्मीर का सोपोर मा सुरक्षा बलों न आतंकी संगठन लश्कर-ए-तैयबा का चार सहयोगियों ते गिरफ्तार करी. ऊं पर घाटी मा आतंकियूं की मदद कन्नो आरोप च.

देवभूमि उत्तराखंड मा कोरोना कू कहर कम नि होंणू च. शाम पांच बजि तक मिली जानकारी का अनुसार, प्रदेश मा आज 33 नया केस समणि ऐन. जेका बाद प्रदेश मा संक्रमितों की संख्या 2586 ह्वे गी. जबकि आज पांच लौखुं की मौत साथ यू आंकड़ा बढ़ीकी 35 ह्वे गी.

चीन और भारत का बीच विवाद का बीच बीजेपी सांसद सुब्रमण्यम स्वामी न त्रिवेंद्र सरकार ते नसीहत दे. ऊं ट्वीट करीकी बोली कि उत्तराखंड सरकार ते मंदिरों कू कब्जा कन्न बजाय चमोली जिला कू सीमांत इलाका बाराहोती पर ध्यान देंण चेंदू.

पूर्व केंद्रीय राज्यमंत्री और सांसद अजय टम्टा न भारत-चीन विवाद पर बोली कि भारत हालांकि शांति कू पक्षधर च. लेकिन जरुरत पड़न्न पर हम मुंहतोड़ जवाब भी दे सकदिन. ऊंन साथ ही साथ कांग्रेस का पूर्व अध्यक्ष राहुल गांधी का बयानों पर भी अपनी प्रतिक्रिया दिनी. बोली कि राहुल गांधी देशे समस्या छिन.

योगगुरु बाबा रामदेवे संस्था पतंजलि की ओर से जारी कोरोनिल दवे पर नयू सच समणि ऐ. उत्तराखंड आयुष मंत्रालय का अनुसार, दिव्य फार्मेसी न इम्यूनिटी बूस्ट कन्नो लाइसेंस ले छो. लेकिन अब वू कोरोना दवे दावा कन्ना छिन.

त्रिवेंद्र सरकार न आज बड़ू फैसला ले. उत्तराखंड मा निजी स्कूलों ते साफ निर्देश दिनी कि इं साल फीस नि बढ़ेली. दरअसल, अभिभावकों दगड़ी फीस खुंण दबाव बढ़ोंढों मामला हाई कोर्ट पौंछी छो. जेमा आज सरकार न यू शासनादेश जारी करी.

कोरोना महामारी का बीच उत्तराखंड मा राजनीतिक घमासान तेज ह्वे गी. एक ओर भाजपा वर्चुअल रैली का जरिया जनसंवाद कन्नी च. त वखि कांग्रेसी नेता भी व्यक्तिगत रूप से 2022 का आगामी चुनाव खुंण जुट गिन.

नाबालिग दगड़ी दुष्कर्म मामले मा आरोपी शांतिकुंज प्रमुख प्रणव पंड्ये मुश्किल बढ़ सकदिन. मामला मा हाई कोर्ट न सख्त रुख अपणे और हरिद्वार एसएसपी ते तीन माह का भीतर जांच पूरी कन्नो आदेश दे.