भारत मा कोरोना कू कहर कम नि होंणू च. अब तक भारत मा कोरोना मरीजुं की संख्या 3, 95, 048 पौछि गी. जबकि यां से मन्न वलों की संख्या 12948 च. भारत मा पिछला 24 घंटों मा रिकॉर्ड 15,413 नए मामला समणि एनी, जबकि अभी तक 24 घंटा मां 306 मौत ह्वे गिन
आज देश-दुनिया मा छठूं अंतरराष्ट्रीय योग दिवस मणये गी. ये मौका पर प्रधानमंत्री नरेंद्र मोदी न देशवास्यूं थै संबोधित करी. ये दौरान उं देशवास्यूं थै योग दिवसै शुभकामनाएं दिनी. पीएम मोदी न बोली अंतर्राष्ट्रीय योग दिवस एकजुटता कु दिन च. दगड़ा मा पीएम न बोली कि इबरी यू दिन फैमिली बॉन्डिंग बढ़ौणों दिन च
आज देश भर मा लोखुं न साल का सबसे बड़ा सूर्य ग्रहण का दर्शन करीन. 25 साल बाद यू पौलू मौका छौ जब सूर्य ग्रहण वलायाकार यानी अंगूठी की तरौ दिखे. सूर्य ग्रहण का दौरान भारत का कई शहरुं का आसमान मा रिंग आफ फायर दिखे.ये दौरान देशभर का सभी धार्मिक स्थल बंद रैनी.
गलवान घाटी मा चीन से विवाद का बाद आज रक्षा मंत्री राजनाथ सिंह न दिल्ली मा चीफ ऑफ डिफेंस स्टाफ जनरल बिपिन रावत और तीनु सेना प्रमुखुं दगड़ि बात करी. सूत्रूं का मुताबिक, बैठक में तीनी सेनाउं थै चीनै हर गतिविधि पर नजर रखणा निर्देश दिेये गिन. बैठक मां (LAC) का मौजूदा हालातुं पर भी चर्चा ह्वे.
श्रीनगर मा जोनिमर इलाका मा सुरक्षा बलु न मुठभेड़ मा तीन आतंकवाद्यूं थै मीर गिरे. यू तीनी आतंकी एक घौर मा लुक्य़ा छां. अभी भी सुरक्षा बलों कु तलाशी अभियान जारी च. ये दौरान श्रीनगर में मोबाइल और इंटरनेट सेवाउं पर रोक लगये गी. सेना का प्रवक्ता न बथै कि सेना लगातार पाकिस्तानी हमलौ कु जवाब देंणी च.
उत्तराखंड मा कोरोना कू कहर थमणं कू नाम नि लेंणू च. शाम पांच बजि तक प्रदेश मा कोरोना मरीजूं की संख्या 2324 ह्वे गी. प्रदेश मा कोरोना का 23 नया मामला समणि ऐनी. अभी तक प्रदेश मा 27 मरीजुं की मौत ह्वे गी, जबकि कोरोना का एक्टिव केसुं की संख्या 796 च
त्रिवेंद्र सरकार का मंत्र्यूं न करी योग
उत्तराखंड मां भी आज पूरा उत्साह से अंतरराष्ट्रीय योग दिवस मणये गी. ये दौरान त्रिवेंद्र सरकार की मंत्र्यूं सुबेर सोशल डिस्टेंसिंग का दगड़ि योग करी. ये दौरान कैबिनेट मंत्री मदन कौशिक, हरक सिंह रावत, धन सिंह रावत, रेखा आर्य न प्रदेशवास्यूं थै योग दिवसै बधै दिन. विधानसभा अध्यक्षन भी योग थै लेकी अपणु संदेश दिनी
14 हजार फीटै ऊंचाई पर आईटीबीपी का जवानुं करी योग
विश्व योग दिवस का मौके पर आईटीबीपी का जवानुं न 14 हजार फीट की ऊंचै पर वसुधारा हिमखंड मा योगाभ्यास करी. योगाभ्यास का दौरान जवानुं सोशल डिस्टेंसिंगौ पूरू ध्यान रखी. यां का अलावा भारतीय पर्वतारोहण एवं स्कीइंग प्रशिक्षण संस्थान द्वारा 9,500 फिटौ ऊंचाई पर औली मा भी आईटीबीपी का जवानुन योग करी. या का अलावा केदारनाथ धाम की तीर्थ पुरोहितुं दगड़ि पुलिस का जवानुं भी योग करी
धर्मनगरी हरिद्वार मां श्रद्धालुंन लगै आस्था की डुबकी
धर्मनगरी हरिद्वार मा सूर्य ग्रहण से पैली सूतक लगणा बंद सबी मंदिर बंद किये गी छा, जू आज सूर्य ग्रहण का बाद खुल गिनी. सूर्य ग्रहण का दौरान श्रद्धालुंन हरकी पैड़ी मां स्नान, ध्यान और हवन करना दगड़ि दान करी. वखी पंगा फिल्म स्टार बाल कलाकार यज्ञ भसीन न भी ओम आरोग्य संस्था दगड़ि मिली नमामि गंगे घाट पर योग करी.
उत्तराखंड मा फिल्म शूटिंग थै अनुमति
लॉकडाउन पांच का बाद मिली छूट का बाद उत्तराखंड सरकारन प्रदेश मा फिल्म शूटिंगै अनुमति दियेली. . शनिवार शाम दौ यां कु थै शासन ने एसओपी (स्टैंडर्ड ऑपरेटिंग प्रोसिजर) जारी करेली. जै मा उत्तराखंड शासन न सोशल डिस्टेंसिंग, हाईजीन, ट्रैवलिंग, रजिस्ट्रेशन जन कई नियम रख्या छन, जौ कुं पालन कन्न जरुरी च.
