चूरू. बुधवार नै चूरू रा कोलासर गांव रै मांय ओ वाकयो पेस आयो हो. जीरै मांय 13 साल रा टाबर री मौत व्हैयी गी. क्यूंकि बो घर रा काम कोनी करया हा. देखबाळा कैवे है कि टाबर नै जमीन माळे पटक-पटक मारयो गियो हो. इण टैम पर टाबर गणेस बेहोस हुई गियो हो. जीरै पाछै माड़साब बीनै सापाखान भी लैर गिया.
बिना बात के ठोका-पीन्दी करतो हो माड़साब
सालासर पुलिस रो कैवणो है कि कोलासर रा रैवासी ओमप्रकास बानै अरज दैर बतायो कि बीरो तेरह बरस रो बेटो गणेस गांव री एक निजी पाठसाळा मांय पढ़ाई करै है. जीको सातवीं कक्सा रो छातर हो. कोरोना बैमारी पाछै तीन म्हीना पैली जदै साळा खुली, तो बो पढ़ाई खातर जाबा लागै हो. पाछला 10 सू 15 दनां सू बीरै सागै मारसाब मार-कुटाई करता हा. आरोपी माड़साब मनोज पै आरोप है कि बो बिना बात के ठोका-पीन्दी करतो हो. बुधवार नै भी गणेस री कुटाई पाछै मनोज पढ़ेसर रा घरआळा नै कानाबाती माळै इत्तला दी ही कै गणेश कैवण रो काम कोनी करै है. जीसू बीरी कुटाई व्ही, तो बो बेहोस व्हैयी गियो.
यह भी पढें- जोधपुर में वसुंधरा राजे: इस बार अजीत भवन नहीं बल्कि Circuit House में ठहरने का प्लान!
माड़साब खियो गणेस तो नाटक करै
गणेस रा पिता रो कैवणो है कि मामला रै मांय आरोपी माड़साब बानै आ तक खियो कि गणेस तो नाटक करै है. इण मामला री जाणकारी मिलता सारु घरआळा पाठसाळा पूग्या अर टाबर नै लैर सपाखाना आया. इण घटना पाछै पाठसाळा रा दूजा टाबर भी घरबारोड़ा है. मामला रै माय पुलिस रपट लैर जांच सरु कर दी है. बठै ही लास नै मोर्चरी मांय मैल्यो गियो है. जीरी चीरफाड़ पाछै बीनै घरआळा रै सुपुर्द करयो जावैला.
