હૈદરાબાદ: દૂધ એ બેશક દરેકના આહારમાં આવશ્યક તત્વ છે, પછી તે બાળકો હોય કે વૃદ્ધો. દૂધ આપણે જે આહાર લઈએ છીએ તેમાં પોષક મૂલ્ય ઉમેરે છે, તેથી જ તેનું સેવન દરેક વય જૂથના લોકોએ કરવું જોઈએ. લોકોને તેની આવશ્યકતા વિશે જાગૃત કરવા અને વૈશ્વિક સ્તરે ડેરીને વ્યવસાય તરીકે પ્રોત્સાહિત કરવા માટે, 'વિશ્વ દૂધ દિવસ' દર વર્ષે 1 જૂનના રોજ ઉજવવામાં આવે છે. વિશ્વ દૂધ દિવસ વિશ્વ ખોરાક તરીકે દૂધના મહત્વને પ્રકાશિત કરે છે. વૈશ્વિક ડેરી બજાર વૈશ્વિક અર્થવ્યવસ્થાનો એક મહત્વપૂર્ણ ઘટક છે અને ભારતીય અર્થવ્યવસ્થાને સ્થાપિત કરવામાં તેનું ખૂબ મહત્વ છે, કારણ કે ભારત વિશ્વમાં દૂધના સૌથી મોટા ઉત્પાદકોમાંનું એક છે.
આ દિવસ ઉજવવાની શરુઆત ક્યારે થઈ: સંયુક્ત રાષ્ટ્રના ખાદ્ય અને કૃષિ સંગઠને 2001માં વિશ્વ દૂધ દિવસની સ્થાપના કરી હતી અને 2016 સુધીમાં સમગ્ર વિશ્વના લગભગ 40 દેશોમાં આ દિવસ મનાવવામાં આવ્યો હતો. આજે રાષ્ટ્રીય અર્થતંત્રમાં ડેરી ઉદ્યોગના મહત્વને ઉજાગર કરવા વિવિધ પ્રવૃત્તિઓનું આયોજન કરવામાં આવે છે. દૂધ અને ડેરી ઉત્પાદનો બધાને જે લાભો પ્રદાન કરે છે તેનો આજે વિશ્વભરમાં સક્રિયપણે પ્રચાર કરવામાં આવે છે. તેની સાથે આ ઉદ્યોગ સાથે સંકળાયેલા ઘણા લોકોની આજીવિકાનો આધાર છે.
