કેળાં
કેળાં શરીરને તાત્કાલિક એનર્જી આપવા માટે જાણીતાં છે. આથી જ, તમે કેટલાક સ્પોર્ટ્સમેનને તેમની મેચની વચ્ચે કેળાં આરોગતા જોયા હશે. એવું પણ કહેવાય છે કે, સવારના નાસ્તામાં એક ગ્લાસ દૂધ સાથે કેળું આરોગવાથી આખા દિવસ માટેની એનર્જી મળી રહે છે. આ પાછળનું કારણ એ છે કે, કેળાંમાં કેલેરી અને કુદરતી શર્કરા પુષ્કળ માત્રામાં રહેલાં હોય છે. માત્રાની વાત કરીએ તો, એક કેળામાં આશરે 150 કેલેરી રહેલી હોય છે, જે લગભગ 37.5 ગ્રામ કાર્બોહાઇડ્રેટ્સ જેટલી થાય. આથી, જો તમે દિવસમાં બે કે તેથી વધારે કેળાં ખાઓ, તો તમારૂં વજન વધે, તેવી શક્યતા રહેલી છે.
દ્રાક્ષ
દ્રાક્ષમાં શર્કરા અને ફેટ, બંને ઊંચી માત્રામાં હોય છે, જેના લીધે તમારૂં વજન વધી શકે છે. 100 ગ્રામ દ્રાક્ષમાં 67 જેટલી કેલેરી અને 16 ગ્રામ જેટલી શર્કરા હોઇ શકે છે. આથી, દ્રાક્ષનું નિયમિતપણે સેવન કરવાથી વજન વધી શકે છે. આમ, જો તમારે વજન ઘટાડવું હોય, તો અતિશય માત્રામાં દ્રાક્ષ આરોગવાનું ટાળવું જોઇએ.
કેરી
કેરીમાં પણ ઘણી ઊંચી માત્રામાં કેલેરી રહેલી હોય છે. ઉદાહરણ તરીકે, કેરીના એક કપ ટુકડામાં 99 જેટલી કેલેરી રહેલી હોય છે. એક કેરીમાંથી સામાન્યપણે 25 ગ્રામ કાર્બ્સ, 23 ગ્રામ કુદરતી શર્કરા અને 3 ગ્રામ ફાઇબર મળે છે. આથી, જો તમે વજન ઘટાડવાનું વિચારતા હોવ, તો કેરીનું અત્યંત મર્યાદિત પ્રમાણમાં સેવન કરવું હિતાવહ છે.
આવોકાડો
આવોકાડોમાં પણ ઘણી ઊંચી માત્રામાં કેલેરી રહેલી હોય છે. આથી, વજન ઊતારવા માંગતા હોય, તેવા લોકોએ આવોકાડોનું સેવન ઓછું કરવું જોઇએ. નિષ્ણાતોના જણાવ્યા પ્રમાણે, 100 ગ્રામ આવોકાડોમાં લગભગ 160 જેટલી કેલેરી રહેલી હોય છે. આવોકાડો તંદુરસ્ત ચરબીનો સ્રોત ગણાતું હોવા છતાં, તે આરોગવાથી તમારું વજન વધી શકે છે. તેમ છતાં, તમે ઓછી માત્રામાં તે આરોગી શકો છો.
ચીકુ
ચીકુ આરોગ્ય માટે ઘણું જ ગુણકારી હોવા છતાં, તેમાં પુષ્કળ માત્રામાં કાર્બોહાઇડ્રેટ્સ અને શર્કરા રહેલાં હોય છે. આથી, ચીકુ ખાવાના કારણે વજન વધી જવાની શક્યતા વધુ રહે છે.
અનાનસ (પાઇનેપલ)
અનાનસમાંથી અઢળક માત્રામાં એન્ટિઓક્સિડન્ટ્સ મળી રહે છે, પરંતુ તેની સાથે-સાથે તેમાં પુષ્કળ માત્રામાં કેલેરી પણ રહેલી છે. અનાનસનું વધુ પડતું સેવન કરવાથી વજનમાં વધારો થઇ શકે છે.
- ડ્રાય ફ્રૂટ્સ
સૂકી દ્રાક્ષ (રેઇઝિન્સ, કિશમિશ) અને મુનક્કા
સૂકી દ્રાક્ષમાંથી ઊંચી માત્રામાં કેલેરી મળે છે, કારણ કે તેમાં તદ્દન અલ્પ માત્રામાં અથવા તો નહિવત્ પાણી રહેલું હોય છે. 1 ગ્રામ સૂકી દ્રાક્ષમાં દ્રાક્ષ કરતાં વધુ કેલેરી રહેલી હોવાનું માનવામાં આવે છે. નિષ્ણાતો જણાવે છે કે, એક કપ સૂકી દ્રાક્ષમાંથી 500 કેલેરી મળે છે અને એક કપ મુનક્કામાં 450 કરતાં વધુ કેલેરી રહેલી હોય છે. આથી, આ બંને પ્રકારનાં ડ્રાય ફ્રૂટ્સ મર્યાદિત પ્રમાણમાં આરોગવાં જોઇએ.
અંજીર
અંજીરનું સેવન લાભદાયી છે, પણ તે અત્યંત ગળ્યું ફળ છે. તેમાં ઘણી ઊંચી માત્રામાં કુદરતી શર્કરા રહેલી હોય છે. આથી, અંજીરને મર્યાદિત પ્રમાણમાં જ આરોગવું જોઇએ. ઘણાં લોકો માત્ર વજન વધારવાના હેતુ માટે જ અંજીરનું સેવન કરતા હોય છે.
આમ, તાજાં ફળો અને શાકભાજી જેવા તમામ કુદરતી આહાર અત્યંત આરોગ્યપ્રદ હોય છે અને જરૂરી પોષક તત્વો પૂરાં પાડે છે, પણ તેમના વધુ પડતા સેવનથી આપણા શરીર પર તેની નકારાત્મક અસર પડી શકે છે. દરેક વસ્તુ મર્યાદિત પ્રમાણમાં ખાવી જોઇએ. જો તમે ચોક્કસ પ્રકારની આરોગ્યની સ્થિતિ ધરાવતા હોવ અને તમને લાગતું હોય કે, ચોક્કસ આહાર લેવાથી તેની નકારાત્મક અસર પડી શકે છે, તો તમારા નિયમિત આહારમાં કયા ખાદ્ય પદાર્થોનો સમાવેશ કરી શકાય, તેની સમજૂતી મેળવવા માટે ન્યુટ્રિશનિસ્ટ કે ડાયેટિશ્યનની સલાહ લેવી જોઇએ. આ ઉપરાંત તમે તેમને તમારો હેતુ પાર પડે, તેવો સંપૂર્ણ ડાયેટ ચાર્ટ તૈયાર કરી આપવા માટે પણ જણાવી શકો છો.
