વાપી: પોલીસની દારૂ ભરેલી કારે બાઈક ચાલકને અડફેટે લેતા મામા-ભાણેજનું મોત, 1 ઈજાગ્રસ્ત

વલસાડના સરીગામથી સરઈ જતા સ્ટેટ હાઇવે પર માંડા ખાતે સોમવારે રાત્રે કાર ચાલકે બે સ્કૂટર સવારને અડફેટે લેતા ઘટના સ્થળ પર બેના મોત થયા હતા. જ્યારે મહિલા સહિત અન્ય એકને ઇજા પહોંચી હતી. અકસ્માત સર્જી કાર પલ્ટી મારતા કારમાંથી દારૂની બોટલ અને બિયરના ટીન મળી આવ્યાં હતાં. જ્યારે આ કારમાં 2 હોમગાર્ડ અને પોલીસ જવાન સવાર હોવાનું પોલીસ તપાસમાં બહાર આવ્યું છે.

વલસાડઃ જિલ્લાના સરીગામ જીઆઇડીસીથી સરઈ જતા સ્ટેટ હાઇવે પર માંડા ખંડવાઈ ખાતે કાર નંબર GJ15CH-6929 અને મોટર સાઈકલ નંબર DN09-4635 અને GJ15OG-0518 વચ્ચે ગમતખ્વાર અકસ્માત સર્જાયો હતો. અકસ્માતમાં કારમાં બેથી વધુ વ્યક્તિઓ સવાર હતા. કારમાં 1 પોલીસ કર્મચારી અને 2 હોમગાર્ડ જવાન સવાર હતાં. કારમાં બિયરના ટીન ભરેલા હતાં. કાર ચાલક નશામાં ચૂર થઈ અકસ્માત સર્જ્યો હોવાનું અનુમાન લગાવવામાં આવી રહ્યું છે.

કાર ચાલકે ઓવરટેકની લ્હાયમાં સરઈ તરફથી આવતા સ્કૂટર સવારને અડફટે લેતા ચાલક પ્રવીણ ગણેશભાઈ પાગી (રહે. સરીગામ, પાગીપાડા) અને ભાણેજ સાગરનું ઘટના સ્થળ પર મોત થયું હતું. જયારે સરસ્વતી પ્રવીણભાઈ પાગીને ગંભીર ઇજા પહોંચતા સારવાર માટે ભીલાડ હોસ્પિટલમાં ખસેડવામાં આવી હતી. અન્ય એક યુવાનને સારવાર માટે ખસેડવામાં આવ્યો હતો. અકસ્માતની ઘટનાની જાણ ભીલાડ પોલીસને થતા ભીલાડના પીએસઆઇ ભાદરકા, એ.ડી.મિયાત્રા સહિત 20થી વધુ પોલીસ જવાન ઘટના સ્થળ પર પહોંચી માર્ગને ખુલ્લો કર્યો કરી કાયદો અને વ્યવસ્થાની સ્થિતિ સંભાળી હતી. મૃતક પ્રવીણ પાગી તેમની પત્ની સરસ્વતીબેન તથા ભાણેજ સરઈથી બાઇક પર પરત સરીગામ તરફ આવી રહ્યા હતા. જેમને કાર ચાલકે ટક્કર મારતા ત્રણે વ્યક્તિને ફેંકી દીધા હતા. પ્રવીણભાઈનો અને બાળકનો મૃતદેહ રોડ કિનારે લગાવેલ રેલિંગની બહાર પડી ગયો હતો. કાર ચાલક પોલીસ કર્મચારી હોવાની અને તેની કારમાંથી બિયરના ટીન મળી આવતા લોકોમાં રોષની લાગણી ભભૂકી હતી.