વલસાડમાં પતંગના વેપારીને પણ લાગ્યું છે કોરોનાનું ગ્રહણ, ગ્રાહકની સંખ્યામાં પણ ઘટાડો

ઉત્તરાયણના પર્વને લઇને વલસાડમાં પતંગ અને ફિરકીનો વેપાર કરતાં અનેક વેપારીઓને પણ કોરોનાનું ગ્રહણ લાગ્યું છે. એક તરફ માર્કેટમાં પતંગ અને ફિરકીનો માલ ઓછો બન્યો છે, જેના કારણે માલની શોર્ટેજ વર્તાઈ રહી છે, તો બીજી તરફ જે વેપારીઓએ ખરીદી કરી છે તેમને ત્યાં ગ્રાહકો ખરીદી માટે પણ ઉદાસીનતા જોવા મળી રહી છે. જેને લઇને વેપારીઓ ચિંતિત છે.

• કોરોનાનું ગ્રહણ પતંગના વેપારીઓને પણ નડયું
• કોરોના કાળમાં ફીરકી અને પતંગ બનાવતા અને કાર્યકરો વતન જતા રહ્યા હોવાથી માર્કેટમાં માલની અછત
• ગ્રાહકોમાં ખરીદી માટે ઉદાસીનતા જોવા મળી
  
  
  
  
  વલસાડઃ માર્ચ માસમાં શરૂ થયેલા લોકડાઉનને કારણે પતંગ અને ફિરકી બનાવનારા અને કાર્યકરો પોતાના વતન ચાલ્યા ગયા છે. જેના કારણે માર્કેટમાં દર વર્ષની જેમ આ વર્ષે જરૂરિયાત મુજબનું પતંગનું ઉત્પાદન થયું નથી. જેના કારણે પતંગ અને ફિરકીની ઘટ વર્તાઇ રહી છે. જેથી પતંગ અને ફિરકીના હોલસેલ વેપારીઓ પણ ખરીદી માટે પડાપડી કરી રહ્યા છે કારણ કે પાછળથી જ્યારે ગ્રાહકે આવશે ત્યારે તેઓને જરૂરિયાત મુજબનો સામાન મળી શકશે નહીં.
  
  
  ઉત્તરાયણ પર્વ નજીક છતાં ખરીદીમાં ઉદાસીનતા
  

covid-19ને લઈને સરકાર દ્વારા સમયાંતરે સોશિયલ ડિસ્ટન્સનું પાલન કરવા માટે વિવિધ નિયમો બહાર પાડવામાં આવી રહ્યા છે, તો થોડા સમય પૂર્વે પસાર થયેલા નવરાત્રી પર્વને પણ મોકૂફ રાખવામાં આવ્યો હતો. પરંતુ ઉત્તરાયણ પર સરકાર દ્વારા તેવા કોઈ કડક પગલા કે સખત નિયમ લાગુ કરવામાં ન આવે તેવી લોકો આશા સેવી રહ્યા છે. તો બીજી બાજુ લોકોને ચોક્કસપણે ખાતરી છે કે આ વખતે પણ ઉત્તરાયણ પર્વના સમયે સરકાર વધુ કોઈ કડક નિયમ લાવશે, જેના કારણે અત્યારથી જ લોકોએ પતંગ અને ફિરકીની ખરીદી કરવાનું ટાળ્યું છે, એટલે કે લોકોમાં જે ઉત્સાહ ખરીદી માટે હોવો જોઈએ તેવો ઉત્સાહ જોવા મળતો નથી.

વેપારીઓને આશા ઉત્તરાયણના બે દિવસ પૂર્વે ગ્રાહકો કરશે ખરીદી

દર વર્ષની જેમ આ વર્ષે પણ ઉત્તરાયણ પર્વમાં પોતાનો ધંધો અને વ્યવસાયને ચલાવવા માટે અનેક વેપારીઓએ પતંગ અને ફિરકીની ખરીદી કરી દુકાનો ભરી છે. પરંતુ હાલ લોકોમાં ખરીદી માટે ઉદાસીનતા છે, ત્યારે દુકાનદારોને આશા છે કે ઉત્તરાયણ પૂર્વે બે દિવસ અગાઉ લોકો ખરીદી કરવા માટે ઉમટી પડશે.


વલસાડ શહેરમાં પતંગ અને ફિરકી નાના વેપારીઓને કોરોનાનું ગ્રહણ નડ્યું છે તો બીજી તરફ એક આશા પણ છે કે ઉત્તરાયણ પર્વના ત્રણ દિવસ પૂર્વે લોકો ખરીદી માટે ઉમટી પડશે. પરંતુ જો સરકાર વધુ કોઈ નવા નિયમો બહાર ન પડે તો લોકો ખરીદી માટે આવશે. પરંતુ જો કોઈ નવા નિયમો બહાર પાડવામાં આવ્યા તો આ વખતે ઉત્તરાયણમાં પણ વેપારીઓને કોરોનાનું ગ્રહણ લાગી શકે છે.