બલીઠા ગામમાં ભંગારના ગોડાઉનમાં લાગી આગ
- આગ લાગતા અફરાતફરી મચી
- ફાયર બ્રિગેડની ટીમે ઘટના સ્થળે પહોંચી આગ પર મેળવ્યો કાબૂ
- ગોડાઉનમાં વેસ્ટ કેમિકલના ડ્રમ તેમજ વેસ્ટ કેમિકલનો જથ્થો હતો
- સદનસીબે કોઇ જાનહાની નહી, પરંતુ ગોડાઉન બળીને ખાકવાપી નજીક બલીઠા ગામમાં ભંગારના ગોડાઉનમાં લાગી ભીષણ આગ
વલસાડઃ જિલ્લાના વાપી નજીક આવેલા બલિઠા ગામમાં એક ભંગારના ગોડાઉનમાં ભીષણ આગ ભભૂકી ઉઠી હતી, જેથી અફરાતફરી મચી ગઇ હતી. જો કે આગની ઘટનામાં કોઈ જાનહાની થઈ નથી, પરંતુ ગોડાઉન બળીને ખાખ થયું હતું.
બલિઠા ગામે સોમવારે સવારે એક ભંગારના ગોડાઉનમાં અચાનક આગ ભભૂકી ઉઠી હતી. આગના કારણે આસપાસના લોકોમાં ભાગદોડ મચી હતી. તેમજ આગને ઠારવા માટે વાપી નાટીફાઇડ, વાપી નગરપાલિકા ફાયરને જાણ કરતા ફાયરની ટીમ ઘટના સ્થળે જઇ આગ ઉપર કાબુ મેળવવા તજવીજ હાથ ધરી હતી.
આ ભંગારના ગોડાઉનમાં વેસ્ટ કેમિકલના ડ્રમ તેમજ વેસ્ટ કેમિકલનો જથ્થો રાખવામાં આવ્યો હતો. જેમાં અચાનક આગ લાગતા તેણે વિકરાળ સ્વરૂપ ધારણ કર્યું હતું. આગની લબકારા મારતી જ્વાળા સાથે કાળાડિબાંગ ધુમાડા ઉઠતા તેમજ ડ્રમ ફાટવાના મોટા અવાજ આવતા હોવાથી લોકોમાં દહેશત સાથે ભાગદોડ મચી ગઈ હતી.
જો કે આગ પર ફાયરના જવાનોએ પાણી અને ફોમનો મારો ચલાવી કાબુ મેળવી લીધો હતો. જેને કારણે જાનહાની ટળી હતી. પરંતુ આગ લાગવાનું કારણ અંકબંધ રહ્યું હતું. જ્યારે આગમાં લાખોનો ભંગાર અને વેસ્ટ કેમિકલ સ્વાહા થતા વેપારીને મોટુ નુકસાન થયું હતું.
