વડોદરા : વડોદરા શહેરને ઇન્ટરનેશનલ એરપોર્ટને આખરે મંજૂરી આપવામાં આવી છે. વડોદરા શહેરની છેલ્લા કેટલાય વર્ષોથી ઇન્ટરનેશનલ એરપોર્ટ તરીકે જાહેર કરવામાં આવે તેવી માંગ હતી. જેને લઇ વડોદરાની એમએસ યુનિવર્સિટીના પદવીદાન કાર્યક્રમમાં આવેલા કેન્દ્રીય ગૃહ પ્રધાન અમિત શાહે સાંસદ રંજન ભટ્ટને કસ્ટમ અને ઇમિગ્રેશનની માન્યતા આપતો પત્ર સુપ્રત કર્યો છે. જેને લઇ હવે વડોદરા એરપોર્ટ ઇન્ટરનેશનલ એરપોર્ટ તરીકે કાર્યરત થઈ શકે છે. સાંસદે જણાવ્યું કે, હવે ગલ્ફ કંટ્રીની કોઈ પણ ફ્લાઇટ શરૂ કરી શકાય છે.
વિદેશ જનાર માટે ખુશીના સમાચાર : ગુજરાતમાં આંતરરાષ્ટ્રીય હવાઈ મથકો આવેલા છે. પરંતુ વડોદરા શહેરમાં ડોમેસ્ટિક એરપોર્ટથી લઈ હવે આંતરરાષ્ટ્રીય એરપોર્ટ બનવા જઈ રહ્યું છે. ત્યારે વિદેશ જનારા પ્રવાસીઓમાં ખુશીનો માહોલ જોવા મળી રહ્યો છે. વડોદરાથી વિદેશ જનારા પ્રવાસીઓ વડોદરા એરપોર્ટથી આંતરરાષ્ટ્રીય એરપોર્ટ પર જઈ ત્યારબાદ તેઓ વિદેશ જઈ શકતા હતા. પરંતુ હવે આંતરરાષ્ટ્રીય એરપોર્ટ જાહેર થતાં પ્રવાસીઓ વડોદરા એરપોર્ટથી ગલ્ફ કંટ્રી માટે હાલમાં ફ્લાઇટ શરૂ કરવામાં આવશે. હવે ટૂંક જ સમયમાં વડોદરા એરપોર્ટથી આ સેવા શરૂ કરવામાં આવશે.
ગત મહિને નિરીક્ષણ કરવામાં આવ્યું હતું : ગત 18 ફેબ્રુઆરીના રોજ વડોદરા એરપોર્ટ અને રાજ્ય સરકારને ગૃહ મંત્રાલય દ્વારા એરપોર્ટને ઇન્ટરનેશનલ કક્ષાની માન્યતા આપવા માટે પણ નિરીક્ષણ કરવામાં આવ્યું હતું. વિવિધ નિરીક્ષણ ટીમો દ્વારા આ એરપોર્ટ ખાતે ચકાસણી કરવામાં આવી હતી. જે કંઈ અસુવિધાઓ છે. તેને સંપૂર્ણપણે યોગ્ય કરવામાં આવે તેવી સૂચનો પણ આપવામાં આવ્યા હતા. આ નિરીક્ષણના ઠીક એક મહિના બાદ કેન્દ્રીય ગૃહ પ્રધાન દ્વારા ગેજેટમાં પ્રસિદ્ધ થયેલો કસ્ટમ ઈમિગ્રેશનની માન્યતાનો પત્ર સાંસદને આપવામાં આવતા વડોદરા શહેરને એક નવી ભેટ પ્રાપ્ત થઈ છે.
સાંસદે આભાર વ્યક્ત કર્યો : આ અંગે સાંસદ રંજન ભટ્ટે જણાવ્યું હતું કે, દેશના વડાપ્રધાન નરેન્દ્ર મોદી દ્વારા વડોદરાનું એરપોર્ટ આંતરરાષ્ટ્રીય લેવલના એરપોર્ટની સુવિધા માટે લોકાર્પણ કરવામાં આવ્યું હતું. આ માટેની પ્રક્રિયા ચાલુ હતું. વડોદરા એરપોર્ટ પર આંતરરાષ્ટ્રીય કક્ષાની ફ્લાઇટ શરૂ કરવામાં આવે તે માટેના પત્રના અદાન પ્રદાનના માધ્યમથી એરપોર્ટ ખાતે નિરીક્ષણ પણ કરવામાં આવ્યું હતું. ગૃહપ્રધાન અમિત શાહ દ્વારા વડોદરા શહેરના અરપોર્ટને ઇન્ટરનેશનલ એરપોર્ટ અને ફ્લાઇટ માટેની મંજૂરી મળી ગઈ છે. સાંસદ રંજન ભટ્ટ દ્વારા વડોદરાની જનતા અને તેઓના વતી વડાપ્રધાન અને ગૃહપ્રધાનનો ખૂબ ખૂબ આભાર વ્યક્ત કર્યો હતો. હવે વડોદરા એરપોર્ટથી ગલ્ફ કંટ્રીની ફ્લાઇટ શરૂ કરવામાં આવશે. જેથી પ્રવાસીઓને ખૂબ સારી સુવિધા ઉપલબ્ધ થશે અને અન્ય એરપોર્ટ પર નહીં જવું પડે.
આ પણ વાંચો : Rajkot Airport: રનવે તૈયાર, શહેરને ટૂંક સમયમાં મળશે રાજ્યનું પહેલું ગ્રીનફિલ્ડ આંતરરાષ્ટ્રીય એરપોર્ટ
હજારો વિદ્યાર્થીઓને ફાયદો થશે : વડોદરા શહેર અને જિલ્લામાંથી દર વર્ષે હજારો વિદ્યાર્થીઓ અભ્યાસ અર્થે વિદેશ જતા હોય છે. વડોદરાથી વધુ વિદ્યાર્થીઓ અમેરિકા અને કેનેડા અભ્યાસ માટે જતા હોય છે. સાથે અન્ય દેશોમાં પણ વિદ્યાર્થી અભ્યાસ અને નોકરી અર્થે જતા હોય છે. તેથી મોટા ભાગના વિદ્યાર્થીઓને આ સુવિધાનો હોવી સીધો લાભ વડોદરા એરપોર્ટથી થશે તે ખૂબ જ સારી બાબત છે.
આ પણ વાંચો : DEEPIKA PADUKON AIRPORT LOOK : ઓસ્કારમાં ભારતનું પ્રતિનિધિત્વ કર્યા બાદ વતન આવી દીપિકા, ફરીથી બ્લેક આઉટફિટ જોવા મળી
ક્યાં ક્યાં જઈ શકશે ફ્લાઇટ : ઉલ્લેખનીય છે કે, આંતરરાષ્ટ્રીય એરપોર્ટને લઈ અગાઉ વડોદરા એરપોર્ટને રનવે ટૂંકો પડતો હોવાની વાત સામે આવી હતી. વડોદરા એરપોર્ટ રનવે હાલમાં 2,466 મીટરનો છે. જેના પર અંદાજે 200 જેટલા પ્રવાસીઓને લઈ જતી ફ્લાઈટ જ ટેક ઓફ કે લેન્ડ થઈ શકે છે. પરંતુ અન્ય દેશોમાં જવા માટેના પેસેન્જર વધારે હોય ત્યારે ફ્લાઈટની લંબાઈ અને પહોળાઈ વધુ હોવાના કારણે ટેક ઓફ અને લેન્ડ થવામાં મુશ્કેલી રહે છે. જેથી રનવે ટૂંકો પડતો હોય છે. આ સંજોગોમાં મળેલી સુવિધાને લઈ ઓછા પેસેન્જર કેપેસિટી વાળી ફ્લાઈટ ઓપરેટ થઈ શકે છે. હાલમાં ભારતના પાડોશી દેશો માટે આ સુવિધા સરળતાથી ઉપલબ્ધ થઈ શકે તેમ છે. હાલમાં ગલ્ફ કંટ્રી ફ્લાઇટ શરૂ થશે. જેમાં હાલમાં દુબઈ, સિંગાપુર, શ્રીલંકા જેવા પાડોશી દેશોમાં સરળતાથી જઈ શકશે.
