Organic Farming: ઈન્ટરનેટની મદદથી ખેડૂતે મેળવી માહિતી, ને આજે હળદરની ઓર્ગેનિક ખેતી કરી બન્યા પ્રેરણાસ્ત્રોત

વડોદરામાં બરકાલ ગામના ખેડૂતે ઈન્ટરનેટનો યોગ્ય ઉપયોગ કરી કઈ રીતે કમાણી કરવી તેનું એક ઉત્તમ ઉદાહરણ પૂરું પાડ્યું છે. તેમણે ઈન્ટરનેટની મદદથી ઓર્ગેનિક ખેતી વિશે માહિતી મેળવી હતી. ત્યારબાદ હળદરની ઓર્ગેનિક ખેતી કરી અન્ય ખેડૂતો માટે તેઓ પ્રેરણાસ્ત્રોત બન્યા છે.

વડોદરાઃ હાલ દિવસને દિવસ તમામ ક્ષેત્રમાં ટેકનોલોજીનો વ્યાપ વધતો જાય છે. તેમાંથી ખેતીનું ક્ષેત્ર પણ દૂર રહી શક્યું નથી. ગુજરાતના ખેડૂતો પણ હવે ઈન્ટરનેટ અને ટેકનોલોજીની મદદથી અવનવી પ્રાકૃતિક ખેતી તરફ વળ્યા છે. ગુજરાતના ખેડૂતોનો પ્રાકૃતિક ખેતી પ્રત્યે આકર્ષણ વધતું જાય છે. ત્યારે વડોદરા જિલ્લાના શિનોર તાલુકાના બરકાલ ગામનાં એક ખેડૂત અનેક ખેડૂત માટે પ્રેરણારૂપ સાબિત થયા છે.

આ પણ વાંચોઃ Cultivated potatoes: ખંભાળિયા તાલુકાના ભાણ ખોખરીના ખેડૂતે એર પોટેટોની કરી ખેતી

લાખો રૂપિયાની કમાણીઃ આ ખેડૂત 6.5 એકર જમીનમાં પ્રાકૃતિક ખેતી કરી લાખો રૂપિયાની કમાણી કરી રહ્યા છે. સાથે જ તેઓ લોકોને સંદેશો પણ પહોંચાડી રહ્યા છે કે, હાલના સમયમાં કેમિકલયુક્ત ખેતી કરતા પ્રાકૃતિક ખેતીમાં વધુ પડતું વળતર અને ઉત્પાદન મળે છે. આ ઉત્પાદન સ્વાસ્થ્ય માટે પણ સારું રહેતું હોય છે.

ખેડૂતો હવે પરંપરાગત ખેતીને બદલે પ્રાકૃતિક ખેતી તરફ વળ્યાઃ હાલમાં સરકાર દ્વારા પણ અવારનવાર ખેડૂતોને પ્રાકૃતિક ખેતી અંગે સેમિનાર યોજીને માહિતગાર કરવામાં આવે છે. ત્યારે ખેડૂતો અવનવી યુક્તિઓ અપનાવીને પ્રાકૃતિક ખેતી તરફ વળ્યા છે. પ્રાકૃતિક ખેતી દ્વારા મેળવેલું ઉત્પાદન આપણા સ્વાસ્થ્ય માટે ખૂબ જ સારું હોય છે. તેમ જ જમીનની ફળદ્રુપતા પણ ટકી રહે છે, જેથી પ્રાકૃતિક ખેતી હાલના યુગમાં પણ વધતી જાય છે. બરકાલ ગામના આ પ્રગતિશીલ ખેડૂતે ઓર્ગેનિક હળદરની ખેતી કરી લાખો રૂપિયાની કમાણી કરી છે અને તે બીજા ખેડૂતો માટે પ્રેરણા સ્ત્રોત બન્યા છે.

પ્રગતિશીલ ખેડૂતે જાતે જાણકારી મેળવી પ્રયાસ કર્યાઃ શિનોર તાલુકાના બરકાલ ખાતે રહેતા ખેડૂત બંકિમ પટેલ છેલ્લા ઘણા વર્ષોથી ઈન્ટરનેટ અને સમાચારપત્રોના માધ્યમથી અવનવી ખેતી કરવાના પ્રયાસો હાથ ધરતા હતા. તેવામાં સોશિયલ મીડિયા પર તેઓ કંઈક સર્ચ કરી રહ્યા હતા. તે વખતે તેમને હળદરની ખેતી વિશે જાણવા મળ્યું હતું. તેને લઈને તેઓ અનેક રાજ્યોની અંદર હળદરની ખેતી કેવી રીતે થાય છે અને તેના માટે કયા કયા સાધનોની જરૂરિયાત છે. તેની પ્રત્યક્ષ જાણકારી મેળવી પોતાના ખેતરમાં ચાલુ વર્ષે ઓર્ગેનિક હળદરનું વાવેતર કર્યું હતું.