વડોદરા: સમગ્ર ગુજરાતમાં વ્યાજખોરોને લઈ ઝુંબેશ હાથ ધરવામાં આવી છે. જેને લઇને પોલીસ પણ એકશનમાં જોવા મળી રહી છે. ત્યારે વડોદરા શહેરમાં વધુ એક વેપારી વ્યાજના ચક્કરમાં ફસાયો છે. વડોદરા શહેરના ગોરવા વિસ્તારમાં ટેમ્પોમાં શાકભાજીનો વેપાર કરતા વેપારીએ 60 હજાર રૂપિયાની રકમ પાછળ માત્ર ચાર મહિનામાં 1 લાખ 40 હજાર વ્યાજ ચૂકવ્યું હતું. છતાં તેને વ્યાજખોરે ચેક રીટર્ન કેસમાં ફસાવવાની ધમકી આપતા આખરે વેપારીએ ગોરવા પોલીસ મથકમાં ફરિયાદ કરી હતી.
વેપારીના ઘરે જઈ ધમકી આપી: શહેરના ગોરવા વિસ્તારમાં રહેતા કનૈયાલાલ યાદવ શાકભાજીનો વેપાર કરે છે. તેઓ ટેમ્પોના માધ્યમથી શાકભાજી વેચે છે. ગોરવા પોલોસ મથકમાં નોંધાવેલ ફરિયાદ અનુસાર નાણાંની જરૂરિયાત હોવાના કારણે મેં ડેવિડ પરમારનો સંપર્ક કર્યો હતો. તેને રૂપિયા 60 હજારની રકમ પાછળ રૂપિયા 35 હજાર વ્યાજની માંગ સાથે કોરા ચેક સિક્યુરિટી પેટે લીધા હતા. ત્યારબાદ ડેવિડ પરમારને દર મહિને વ્યાજ પેટે 35 હજાર ચૂકવતો હતો. ચાર મહિનામાં કુલ 1 લાખ 40 હજાર વ્યાજ ચૂકવ્યા બાદ આર્થિક સંક્રમણના કારણે શાકભાજીનો ધંધો બંધ થઈ ગયો હતો. જેથી હું તેને વ્યાજની રકમ આપવાનો બંધ કરતા ડેવિડ મારા ઘરે આવ્યો હતો. અને મારી સાથે ઝઘડો કરી ચેક બાઉન્સ કરાવી કોર્ટમાં ખોટી ફરિયાદની ધમકી આપી હતી.
વ્યાજખોર સામે ફરિયાદ: વ્યાજખોર ડેવિડ પરમારે 60 હજાર રૂપિયા સામે 1લાખ 40 હજાર રૂપિયા પડાવી લીધા હતા. છતાં પણ વધુ વ્યાજની માંગણી સાથે ધમકી આપતા વેપારીએ ગોરવા પોલીસ મથકમાં ફરિયાદ નોંધાવી હતી. આ ફરિયાદના આધારે પોલીસે આરોપી વિરુદ્ધ નાણાં ધિરાણ અધિનિયમ તથા ધાક ધમકી સહિતની કલમ હેઠળ ગુનો નોંધી આરોપીની ધરપકડના ચક્રો ગતિમાન કર્યા છે.
વ્યાજખોરો સામે કાર્યવાહી: વડોદરા શહેર પોલીસ દ્વારા છેલ્લા ઘણા સમયથી વ્યાજખોર સામે કાર્યવાહી કરવામાં આવી રહી છે. સાથે જ વ્યાજખોરોના ત્રાસથી કંટાળેલ વેપારી હોય કે અન્ય સામાન્ય વર્ગના લોકોની મદદથી આવી છે. ત્યારે મોટાભાગના વ્યાપારીઓ આ વ્યાજના ચક્કરમાં ફસાયા હોવાનું જાણવા મળી રહે છે. તો બીજી તરફ વધુમાં વધુ વ્યાજ દર એ વ્યાજ વસુલતા વ્યાજખોરો સામે વડોદરા શહેર પોલીસ દ્વારા સતત કાર્યવાહી કરવામાં આવી રહી છે. કેટલાક વ્યાજખોરોને તો પાસ હેઠળ પણ કાર્યવાહી કરવામાં આવી રહી છે.
