વડોદરાઃ સુત્રો દ્વારા મળતી માહિતી અનુસાર, શહેરના અલકાપુરી વિસ્તારમાં મેરીઓન નામે એક વૈભવી હોટલની કન્સ્ટ્રક્શનની કામગીરી કરવામાં આવી રહી હતી, ત્યારે સવારના સમયે આ કન્સ્ટ્રક્શનની ચાલતી કામગીરી દરમિયાન એક શ્રમજીવી મહિલા નીચે પટકાતા અન્ય કામદારો ઘટના સ્થળે દોડી આવ્યાં હતાં. મહિલાને માથાના ભાગે ગંભીર ઈજાઓ પહોંચતા તેનું ઘટના સ્થળે જ કમકમાટી ભર્યુ મોત નીપજ્યું હતું.
આ બનાવની જાણ થતાં જ સુપરવાઇઝર અને બિલ્ડરે સ્થળ પર દોડી આવી સમગ્ર મામલાને આવરી લેવાનો પ્રયાસ કર્યો હતો. જોકે, આ ઘટના અંગેની જાણ થતાં જ સ્થાનિક પોલીસે દોડી આવી 108 મારફતે મહિલાના મૃતદેહને એસ.એસ.જી હોસ્પિટલ ખાતે ખસેડી આગળની તપાસ હાથ ધરી હતી.
જો કે, મળતી માહિતી પ્રમાણે આ મહિલાનું મોત ક્યાં કારણોસર થયુ છે, તે ચાક્કસ જાણી શકાયુ નથી, પરંતુ ઘટના બાદ તમામ કામદારોને સ્થળ પરથી રવાના કરી બિલ્ડર દ્વારા આ સમગ્ર ઘટના અંગે પડદો નાખવાનો પ્રયાસ કરવામાં આવ્યો હતો, તે વાતને પણ નકારી શકાય તેમ નથી.
