મોરબીમાં હત્યાના ગુનામાં સંડોવાયેલા આરોપીને અમદાવાદ એટીએસ પોલીસે હત્યા સહિતના બનાવમાં ઝડપી પાડી અમદાવાદ ખાતે સાબરમતી જેલ હવાલે કર્યો હતો. આરોપી હિતુભા ઝાલાને અમદાવાદ પોલીસ જાપ્તા સાથે મોરબી લઇ જવામાં આવી રહ્યો હતો.
ધ્રાંગધ્રા હાઇવે પર આરોપીનો ભાગવાનો નિષ્ફળ પ્રયાસ, ગણતરીના કલાકોમાં પોલીસે પકડી પાડ્યો
ધ્રાંગધ્રા હાઇવે પર આવેલ એક હોટલ પાસેથી આરોપી હિતુભા પોલીસ જાપ્તામાંથી ખાનગી ફોર્ચ્યુનર કારમાં નાસી છૂટયો હતો. ત્યારબાદ સુરેન્દ્રનગર ડીએસપી મહેન્દ્ર બગડિયા સહીત ડીવાયએસપી અને પોલીસ કાફલો ઘટના સ્થળે આવી પહોંચ્યો હતો. આરોપીને ઝડપી પાડવા હાઇવે સહીત જિલ્લામાં નાકાબંધી કરી હતી. જેમાં હોટલના સીસીટીવી ફુટેજની મદદથી આરોપીને કારમાં ભગાડી જનાર ડ્રાઈવર મોહિત મહેન્દ્રભાઈ જોશીને વઢવાણ પાસેથી ફોર્ચ્યુનર કાર સાથે ગણતરીના કલાકોમાં જ ઝડપી પાડ્યો હતો અને કાયદેસરની કાર્યવાહી હાથ ધરી હતી.
