ટોસિલિઝુમેબ ઈન્જેકશનની કાળા બજારી, 7 લોકો સામે સુરત પોલીસે ફરિયાદ નોંધી

કોરોનાના આ આકરા સમયમાં સુરત જિલ્લામાં ટોસિલિઝુમેબ ઈન્જેકશનની કાળા બજારી ચાલ રહી હતી. આ સમગ્ર પ્રકરણમાં ઔષધ નિયંત્રણ વિભાગ દ્વારા બે કેમિસ્ટ સહિત 7 લોકો સામે ફરિયાદ દાખલ કરાઇ હતી.

ઇંજેક્શનની કાળાબજારી

• સુરતમાં ટોસિલિઝુમેબ ઈન્જેકશનની કાળા બજારી
• ટોસિલિઝુમેબ ઈન્જેકશનની કાળા બજારીમાં 2 કેમિસ્ટ સહિત 7 લોકો સામે ફરિયાદ દાખલ
• કોરોનાના અતિ ગંભીર દર્દીઓને આપવામાં આવે છે ટોસિલિઝુમેબ ઈન્જેકશન
• ઈન્જેકશન કૌભાંડ મામલે સુરતની ઉમરા પોલીસે 7 લોકો સામે ફરિયાદ નોંધી
• 40 હજારના ઇન્જેક્શનના 70 હજારથી 1 લાખ સુધી રૂપિયા દર્દીઓ પાસેથી વસુલાયા

સુરતઃ કોરોના કાળ જેવા આકરા સમયમાં ટોસિલિઝુમેબ ઈન્જેકશનની કાળા બજારી કરનારા 7 લોકો સામે આખરે સુરત પોલીસે ફરિયાદ નોંધી છે. આ સમગ્ર પ્રકરણમાં ઔષધ નિયંત્રણ વિભાગ દ્વારા આ ફરિયાદ દાખલ કરવામાં આવી છે. જેમાં 2 કેમિસ્ટ સહિત 7 લોકો સામે ફરિયાદ દાખલ કરાઇ છે, જોકે હજુ તમામ આરોપીઓની ધરપકડ બાકી છે.

સુરતમાં દિવસેને દિવસે કોરોના કેસોની સંખ્યા વધી રહી છે અને અતિ ગંભીર દર્દીઓને ટોસિલિઝુમેબ ઈન્જેકશન આપવામાં આવે છે. આ ઇંજેક્શન ડોક્ટરના પ્રિસ્ક્રીપ્શનથી આપવામાં આવતું હોય છે પરંતુ છેલ્લા કેટલાક સમયથી આ ઇંજેક્શનની અછત સર્જાઇ હતી. તેની ફરિયાદ ખોરાક અને ઔષધ નિયંત્રણ વિભાગ સુધી પહોંચી હતી તે વિભાગની તપાસમાં બહાર આવ્યું છે કે, કેટલાક કેમિસ્ટ સહિત લોકો આ ઇંજેક્શનની કાળાબજારી કરી રહ્યા હતા. 40 હજારના ઇન્જેક્શનના બદલે 70 હજારથી 1 લાખ સુધીના રૂપિયા દર્દીઓના પરિજનો પાસેથી વસૂલવામાં આવ્યા હતા. આખરે સમગ્ર ઘટનાની તપાસ કર્યા બાદ ઈન્જેકશન કૌભાંડ મામલે સુરતની ઉમરા પોલીસે 7 લોકો સામે ફરિયાદ નોંધી હતી.સુરતમાં ખોરાક અને ઔષધ નિયંત્રણ વિભાગ દ્વારા ઉમરા પોલીસ મથકમાં આ ફરિયાદ દાખલ કરવામાં આવી છે. જેમા સાર્થક ફાર્માની માલિક ઉમાં કેજરીવાલ, મિતુલ શાહ, અમિત મછરાણી, ઘનશ્યામ વ્યાસ, અભિષેક, ભાવેશ સોલંકીનો સમાવેશ થયા છે. આ ફરિયાદ ખોરાક અને ઔષધ નિયંત્રણ તંત્ર વિભાગના નિરીક્ષણ અધિકારી મહેશભાઈ ઇટલીયા દ્વારા નોંધાવવામાં આવી છે. જેની સમગ્ર તપાસ હવે ઉમરા પોલીસે શરૂ કરી દીધી છે.