સુરત: કેન્દ્ર સરકાર દ્વારા લાગુ કરવામાં આવેલા જીએસટી કાયદા બાદ જીએસટી પોર્ટલની ખામીની અનેક ફરિયાદો ઉઠવા પામી છે. જીએસટી પોર્ટલમાં ટેક્નિકલ ખામીના કારણે વેપારીઓને મુશ્કેલીઓ પડી રહી છે. તેવી અવારનવાર પડતી મુશ્કેલીઓ અંગે વેપારીઓ અને ટેક્સ બાર એસોસિયેશન દ્વારા સ્ટેટ જીએસટી, ચેરમેન સહિત જે તે વિભાગમાં લેખિતમાં રજૂઆતો કરવામાં આવી છે. તેમ છતાં જીએસટી પોર્ટલમાં આવતી ખામીઓ દૂર કરવામાં સરકાર નિષ્ફળ નીવડી રહી હોવાના આક્ષેપ સાઉથ ગુજરાત કોમર્શિયલ ટેક્સ બાર એસોસિયેશન દ્વારા કરવામાં આવ્યાં છે.
આ અંગેના વિરોધ સાથે સુરત ખાતે હાથમાં કાળી પટ્ટી બાંધી ટેક્સ બાર એસોસિયેશનના સભ્યોએ દેખાવો કર્યા હતા. આ તકે વિરોધના વંટોળ વચ્ચે એસોસિયેશનના પ્રમુખે જણાવ્યું હતું કે, છેલ્લા ૩૧ મહિનાઓથી આ સમસ્યાઓ ચાલી આવી છે. અનેક રજૂઆતો કરવા છતાં ધ્યાન આપવામાં આવ્યું નથી. જેનો ભોગ વકીલો અને વેપારીઓએ બનવુ પડ્યું છે. જેના કારણે 1800 કરોડની લેટ ફી ભરવાની નોબત પડી છે. જો આગામી દિવસોમાં આ સમસ્યાનું નિરાકરણ નહીં લાવવામાં આવે તો વિરોધની કોઈ અલગથી રણનીતિ ઘડવામાં આવશે.
