ગોંડલમાં વર્તમાન સમયમાં મહારાજા સાહેબ જ્યોતીન્દ્રસિંહજી તેમજ મહારાણી કુમદકુમારીજી સાહેબ દ્વારા દેશ વિદેશમાંથી આવતા પર્યટકોને રાજવી સમયના દ્રશ્ય જોવા મળે તે હેતુથી દરબારગઢ નવલખા પેલેસ ખાતે જુદા જુદા વિભાગમાં અવનવા મ્યુઝિયમ ખોલવામાં આવ્યા છે. જેમાં ટી પોટ મ્યુઝિયમનો વધારો કરાયો છે. ટી પોટ મ્યુઝિયમ પેલેસના મેનેજર ભાવેશભાઈ રાધનપુરાએ જણાવ્યું હતું કે, ગોંડલ ખાતેના આ મ્યુઝિયમમાં સો વર્ષથી પણ પૌરાણિક વસ્તુનો સંગ્રહ કરાયો છે. ટી પોર્ટ મ્યુઝિયમની અંદર 100 થી પણ વધારે ટી પોટ રખાયા છે. સાથે જ વિવિધ વર્ષના કેલેન્ડર દર્શાવતી પ્લેટ પણ રાખવામાં આવી છે. ગોંડલ મહારાજા ભગવતસિંહજી જે પ્લેટમાં ભોજન કરતા હતા તેને પણ શોકેસમાં રાખવામાં આવી છે અને અનેક વસ્તુઓ ઉપર ગોંડલ રાજ્યનો સિમ્બોલ પણ જોવા મળી રહ્યો છે.
તદ્ઉપરાંત ગોંડલના ઓચાર્ડ પેલેસ ખાતે એન્ટિક કાર કલેક્શન પણ વિશ્વ વિખ્યાત છે. જે જોવા માટે દેશ વિદેશથી અનેક પ્રવાસીઓ આવી ચૂક્યા છે. ક્રિકેટ સ્ટીવ વોગ, ફિલ્મી સિતારાઓ સલમાન ખાન, મિથુન ચક્રવર્તી સહિતના કલાકારો પણ રાજવી પરિવારનું અદભૂત કલેક્શન જોઇ આશ્ચર્યચકિત થઇ ચુક્યા છે.
