- રાજવી પરિવારમાં વારસાઈ મિલ્કત વિવાદ
- બહેન બાદ ભત્રીજાએ માંધાતાસિંહ સામે દાવો કર્યો
- ભત્રીજાએ પણ વારસાઈ મિલ્કત મામલે વાંધો ઉઠાવ્યો
રાજકોટઃ રાજકોટના રાજવી પરિવારમાં વારસાઈ મિલ્કતને લઈને એક બાદ એક નવા નવા વિવાદો સામે આવી રહ્યા છે. જેમાં રાજવી માંધાતાસિંહ અને તેમના બહેન અંબાલિકાદેવી વચ્ચેના વિવાદ બાદ હવે તેમના ભત્રીજા રણશૂરવીરસિંહ અનિરુદ્ધસિંહ જાડેજાએ દાવો માંડ્યો છે. જેમાં તેમને માંધાતાસિંહના પિતા મનોહરસિંહજી અને તેમના પિતા પ્રદ્યુમ્નસિંહજીના વસિયતનામાને ખોટો હોવાનું જણાવ્યું છે. જ્યારે અગાઉ અંબાલિકા દેવીએ વારસાઈ મિલ્કત મામલે કરેલી અરજી અંગે રાજકોટ પ્રાંત અધિકારીની કોર્ટમાં ચુકાદો બહેનના પક્ષમાં આવી ગયો છે, ત્યારબાદ બહેન દ્વારા હવે મનોહરસિંહજીએ કરેલી વસિયતને સિવિલ કોર્ટમાં પડકારાઈ છે. જે અંગેની તારીખ પણ બાર પાડવામાં આવી છે પરંતુ હવે ભત્રીજાએ પણ વારસાઈ મિલ્કત મામલે વાંધો ઉઠાવ્યો છે.
આ પણ વાંચો: રાજકોટના રાજવી પરિવારમાં મિલ્કતનો મામલો, અંબાલાદેવીના તરફેણમાં આવ્યો ચુકાદો
રાજવી પરિવારની તમામ મિલ્કતમાં માંગ્યો ભાગ
રાજકોટના વર્તમાન રાજવી માંધાતાસિંહના ભત્રીજા રણશૂરવીરસિંહ અનિરુદ્ધસિંહ જાડેજાએ પણ વારસાઈ મિલ્કત અંગે દાવો કર્યો છે. આ દાવા સાથે રણશૂરવીરસિંહએ માંધાતા સિંહના પિતા મનોહરસિંહજી અને તેમના પિતા પ્રદ્યુમ્નસિંહજીના વસિયતનામાને ખોટો હોવાનો આક્ષેપ પણ કર્યો છે. તેમજ રાજપરિવારની તમામ મિલકતોમાં પોતાનો હિસ્સો માગ્યો છે. જો કે, માંધાતાસિંહ અને બહેન અંબાલિકા દેવી વચ્ચેના વિવાદ મામલે કોર્ટમાં હજુ કેસની સુનાવણી શરૂ થઈ છે. એવામાં હવે ભત્રીજા રણશૂરવીરસિંહ દ્વારા પણ પરિવારની વારસાઈ મિલ્કત મામલે દાવો કરવામાં આવ્યા વધુ એક વખત રાજવી પરિવાર ચર્ચામાં આવ્યો છે.
વીલનું પ્રોબેટ અથવા લેટર્સ ઓફ એડમિનિસ્ટ્રેશન કોર્ટથી મેળવેલું નથી
ભત્રીજા રણશૂરવીરસિંહે દાવો કર્યો છે કે, રાજકોટના પૂર્વ રાજા સ્વ.પ્રદ્યુમ્નસિંહજીને તેમના વડીલો પાસેથી 685 એકર 15 ગુંઠા જમીન વીડીની જમીન પૂર્વજો પાસેથી મળી હતી. જે ખરેખરમાં પરિવારની સંયુક્ત કુટુંબની મિલ્કત છે. જ્યારે આ મિલ્કતમાં પ્રદ્યુમ્નસિંહજીના વારસદારોનો વણવહેંચાયેલો ભાગ છે. જે મિલ્કત અંગેના મીટ્સ એન્ડ બાઉન્ડ્સના આધારે ભાગ પણ પડ્યા નથી, ત્યારબાદ આ વારસાઈ મિલ્કતનું પ્રદ્યુમ્નસિંહજીએ મનોહરસિંહજીની તરફેણમાં લ કરી આપ્યું હતું. જ્યારે મનોહરસિંહજીએ આ વીલનું પ્રોબેટ અથવા લેટર્સ ઓફ એડમિનિસ્ટ્રેશન કોર્ટથી મેળવેલું નથી. જેના કારણે આ મિલ્કતમાં મનોહરસિંહજીનો કોઇ હક્ક કે અધિકાર આ પ્રોપર્ટી પર સ્થાપિત થતો નથી.
આ પણ વાંચો: રાજકોટના રાજવી પરિવારમાં મિલ્કત વિવાદ, 31મીએ મહત્વની સુનાવણી
મુખ્યત્વે 11 જેટલી મિલ્કતમાં માંગ્યો ભાગ
માંધાતાસિંહના ભત્રીજા રણશૂરવીરસિંહે મુખ્યત્વે રાજવી પરિવારની 11 મિલકતોમાં પોતાનો ભાગ માંગ્યો છે. જેમાં 675 એકર ખેતીની જમીન, વીડી તેમજ રાંદરડા તળાવની વિસ્તારની જમીન સહિતની મિલ્કતનો સમાવેશ થાય છે. આ સિવાય તાજેતરમાં જ માંધાતાસિંહ અને બહેન અંબાલિકા દેવી વચ્ચેનો જે વિવાદ સામે આવ્યો છે. તે રાજકોટના માધાપર વિસ્તારની જમીન અને સરધારના દરબારગઢનો પણ સમાવેશ થાય છે. જો કે રાજવી પરિવારમાં વારસાઈ મિલ્કત મામલે એક બાદ એક વિવાદો સામે આવી રહ્યા હોવાના કારણે હાલ શહેરભરમાં ચર્ચાનો વિષય બન્યો છે.
