પૂજ્ય રમેશભાઈ ઓઝા 31 ઓગષ્ટ 1957માં ગુજરાતમાં જન્મયા. અમરેલી જિલ્લાના રાજુલા તાલુકામાં આવેલું દેવકા ગામ તેમનું જન્મસ્થળ. ઔદિચ્ય બ્રાહ્મણ જ્ઞાતિમાં જન્મેલા રમેશભાઈને કથા કહેવાની કળા તેમજ ધર્મ અને આધ્યાત્મનું જ્ઞાન વારસામાં જ મળ્યુ હતું. તેમના પિતા અને કાકા પણ કથા કહેતા હતાં. પછી અઢળક વાંચનથી રમેશભાઈએ આ જ્ઞાનને વધુ સમૃદ્ધ બનાવ્યુ. તેમનું પ્રાથમિક શિક્ષણ રાજુલાની તત્વજ્યોતિ શાળામાં થયું અને અંગ્રેજી સાથે સ્નાતક થયા. તેમનું કોલેજશિક્ષણ મુંબઈમાં થયુ અને કોલેજકાળ દરમિયાન જ મુંબઈ સેન્ટ્રલમાં પહેલી વ્યવસાયિક કથા યોજી હતી.
કથાકાર તરીકે મુંબઈથી શરુ થયેલી યાત્રા વિદેશો સુધી વિસ્તરી અને પ્રસરી, ભાગ્યે જ એવો કોઈ દેશ હશે જ્યાં પૂજ્ય રમેશભાઈ ઓઝાની કથા નહીં થઈ હોય. 2018 સુધીમાં ભાઈશ્રીએ 29 દેશોમાં 460થી વધારે ભાગવત કથા, 100થી વધુ રામ કથા, 35થી વધુ નવરાત્રી અનુષ્ઠાન, 45 જેટલા ગીતા જ્ઞાન યજ્ઞ, ઉપરાંત અનેક હનુમાન ચાલિસા કથા, શિવચરિત્ર કથા કરી છે.
જન્મભૂમિ દેવકાનું ઋણ ચુકવવા રમેશભાઈએ તેમના ગામમાં 'દેવકા વિદ્યાપીઠ'ની સ્થાપના કરી હતી. જેના માધ્યમથી તેઓ શિક્ષણ આપવાનું કાર્ય કરે છે. તેમજ પોરબંદરના બાબડા ગામની સાંદિપની વિદ્યાનિકેતનને જીવતદાન આપીને તેના સંચાલનમાં પૂજ્ય રમેશભાઈ પોતાનો સમય, નાણાં અને શક્તિ ખર્ચી રહ્યા છે. તેમજ 'તત્વદર્શન' સામયિક દ્વારા તેઓ સદ્દવિચારનો ફેલાવો કરી રહ્યા છે. રમેશભાઈ ઓઝાને "ભાગવત આચાર્ય", "ભાગવત રત્ન", "ભાગવત ભૂષણ" સહિત વિવિધ પુરસ્કથી સમ્માનિત કરાયા છે.
વસુધૈવ કુટુમ્બકમની ભાવનાના પ્રહરી, હિન્દુ ધર્મના હિતેચ્છુ એવા પૂજય રમેશભાઈના જન્મદિન નિમિત્તે પોરબંદરમાં તેમના ભાવીકોએ સેવાયજ્ઞ તરીકે ઉજવી ચોપાટી ખાતે સ્વચ્છતા અભિયાન હાથ ધર્યુ હતું.
