ભારતીય જનતા પાર્ટીએ જે કર્યું છે, તે કરી બતાવ્યું છે: શિવરાજ સિંહ ચૌહાણ

પંચમહાલઃ જિલ્લામાં ભાજપ અને કોંગ્રેસના ઉમેદવારો ચૂંટણી પ્રચાર કરી રહ્યા છે. ત્યારે અન્ય રાજ્યોમાંથી પણ પ્રચાર અર્થ રાજકીય નેતાઓ પંચમહાલમાં આવી રહ્યા છે. ત્યારે હાલોલ તાલુકાના વડા તળાવ પાસે આવેલા ઢીકવા ગામે મધ્યપ્રદેશના પૂર્વ મુખ્યપ્રધાન શિવરાજ સિંહ ચૌહાણ પ્રચાર અર્થે આવ્યા હતા.

પંચમહાલ જિલ્લામાં હાલોલ વિધાનસભા વિસ્તારનો છોટાઉદેપુર લોકસભા વિસ્તારમાં સમાવેશ થાય છે. છોટાઉદેપુર લોકસભા મત વિસ્તારના ભાજપના ઉમેદવાર તરીકે ગીતાબેન રાઠવાને ઉભા રાખવામાં આવ્યા છે. તેમના પ્રચાર અર્થે હાલોલ તાલુકાના ઢીકવા ગામ પાસે એક જન સભાનું આયોજન કરવામાં આવ્યું હતું. તેમાં મધ્યપ્રદેશના પૂર્વ મુખ્યપ્રધાન શિવરાજ સિંહ ચૌહાણ હાજર રહ્યા હતા. વાતાવરણ યોગ્ય ન હોવાને કારણે સવારે 10 વાગ્યાનો કાર્યક્રમ રાખવામાં આવ્યો હતો. પણ હવામાન હોવાને કારણે તેમનું હેલિકોપ્ટર ઊડી શક્યું ન હતું ત્યાંથી તેઓ ચાર કલાક મોડા આવ્યા હતા.

તેમને ઉપસ્થિતોને સંબોધન કરતાં જણાવ્યું હતું કે, ભારતીય જનતા પાર્ટી જે કર્યું છે. તે કરી બતાવ્યું છે. પ્રધાનમંત્રી માટે જે શબ્દોનો ઉપયોગ કરવામાં આવે છે તે યોગ્ય નથી આ માત્ર પ્રધાનમંત્રીનું અપમાન નથી પરંતુ ગુજરાતની 6 કરોડ જનતાનું અપમાન છે. હું બાજુમાં ચૂંટણી પ્રચાર કરીને આવ્યો છું, અને ત્યાં પણ લોકો પ્રધાનમંત્રી તરીકે નરેન્દ્ર મોદીને જોવા માંગે છે. તેમણે વધુમાં કોંગ્રેસ ઉપર ચાબખા કર્યા હતા. આ સભામાં રાજ્યપ્રધાન જયદ્રથ સિંહ પરમાર સહિત ભાજપના સ્થાનિક અગ્રણીઓ અને કાર્યકરો ઉપસ્થિત રહ્યા હતા.