મોરબીમાં 75 પ્રજ્ઞાચક્ષુઓએ એક દિવસીય જૂનાગઢ પ્રવાસની મોજ માણી

મોરબીઃ લક્ષ્મીનગર સ્થિત પ્રજ્ઞાચક્ષુ સંસ્થામાં વસતા પ્રજ્ઞાચક્ષુઓ માટે કે.કે ટ્રાવેલ્સ દ્વારા એક દિવસીય પ્રવાસનું આયોજન કરવામાં આવ્યુ હતું. આ પ્રવાસમાં પ્રજ્ઞાચક્ષુઓને કોઈ અગવડતા ના પડે તેની પુરતી તકેદારી રાખીને સુંદર આયોજન કરવામાં આવ્યુ હતું.

મોરબીના લક્ષ્મીનગર પ્રજ્ઞાચક્ષુ સંસ્થા ખાતેથી કે.કે. ટ્રાવેલ્સની બસે પ્રવાસની શરૂઆત કરી હતી. જેનો પ્રથમ પડાવ રતનપર રામજી મંદિર હતો. આ પ્રવાસના આયોજક પ્રદીપભાઈ દ્વારા પ્રજ્ઞાચક્ષુઓને કોઈ અગવડતા ના પડે તેની પુરતી તકેદારી રાખીને પ્રજ્ઞાચક્ષુ ભાઈ-બહેનોને ચા નાસ્તો તેમજ ભોજન માટે રસોઈયાની વ્યવસ્થા રાખીવામાં આવી હતી. તેમજ જૂનાગઢ પહોંચી રીક્ષાઓ દ્વારા અંધ ભાઈ-બહેનોને ઉપરકોટની મુલાકાતે લઈ જવામાં આવ્યા હતા. આ સાથે જ પ્રવિણભાઈ ગાઈડ તરફથી જૂનાગઢના ઈતિહાસ સાથે ભાઈ-બહેનોને અવગત કરાવામાં આવ્યા હતા. આ બાદ પ્રવાસ દામોકુંડ તરફ આગળ વધ્યો હતો. દામોકુંડમાં અંધ ભાઈ-બહેનોએ હાથ-પગ ઝબોડી આનંદની અનુભૂતિ કરી હતી. જે બાદ જીત પુરોહિત દ્વારા નરસિંહ મહેતાના ઇતિહાસ વિશે માહિતી આપવામાં આવી હતી ત્યારબાદ ભવનાથ મહાદેવના દર્શન કરવામાં આવ્યા હતા.

આખરે આ પ્રવાસ ખોડલ ધામ મુકામે પહોંચ્યો હતો જ્યાં માં ખોડલના દર્શન કરી નેત્રહીન ભાઈ-બહેનોએ ધન્યતા અનુભવી હતી. પ્રવાસના અંતિમ પડાવે લજાઈ પાસે આવેલા જોગ આશ્રમ ખાતે પણ મુલાકાત લેવામાં આવી હતી. ઉલ્લેખનીય છે કે, પ્રદીપભાઈના પુત્રવધુ ભાવિશાબેનના જન્મદિવસની ઉજવણીના ભાગરૂપે આ પ્રવાસનું આયોજન કરવમાં આવ્યુ હતું.