મોરબીમાં ત્રણેક માસ પૂર્વે ડોકટર્સના ગ્રુપ દ્વારા શહેરની ગંદકીને દુર કરવા સ્વચ્છતા અભિયાન ચલાવવાનું આયોજન કરાયું હતું. ત્યારે ડોકટર્સના ગ્રુપે સફાઈ અભિયાનનો શુભારંભ કરાવ્યો હતો અને મોરબીને ગંદકીમુક્ત કરવાના મક્કમ નિર્ધાર સાથે શરુ થયેલા સેવાયજ્ઞમાં એક બાદ એક લોકો જોડાઈ રહ્યા છે.
આ સફાઈ અભિયાન ટીમમાં વેપારીઓ, શિક્ષકો, યુવાનો,મહિલાઓ, બાળકો અને વડીલો હોશભેર જોડાઈ રહ્યા છે અને ઝાડું ઉઠાવીને મોરબીને સ્વચ્છ બનાવવા રવિવારે સવારમાં પરસેવો રેડી રહ્યા છે. મોરબીના કુબેરનગર વિસ્તાર આસપાસના વિસ્તારમાં જાહેર રોડ, ઉકરડાઓ સહિતના સ્થળે સફાઈ કરવામાં આવી હતી અને રોડ રસ્તાઓ ચોખ્ખા ચણાક કરીને જ ટીમ ઝંપી હતી. પોતાના વિસ્તારને મસ્ત ચોખ્ખો જોઇને લત્તાવાસીઓએ પણ સફાઈ અભિયાન ટીમનો આભાર માન્યો હતો.
