જૂનાગઢમાં કોરોના સંક્રમણમાં સાવચેતી અને શાંતિપૂર્ણ વાતાવરણમાં JEEની પરીક્ષા યોજાઇ

JEE પરીક્ષાનો શુભારંભ થયો છે. ત્યારે જૂનાગઢના ડૉ. સુભાષ ટેકનિકલ કેમ્પસ ખાતે પરીક્ષાનો પ્રારંભ થયો હતો. જેમાં JEE પરીક્ષા આપવા માટે આવેદન કરનાર પરીક્ષાર્થીઓ શાંતિપૂર્ણ વાતાવરણમાં પરીક્ષા આપી હતી. જ્યારે આગામી 6 તારીખ સુધી 454 જેટલા પરીક્ષાર્થીઓ તેમની કારકિર્દીલક્ષી પરીક્ષાઓ આપશે.

જૂનાગઢ: શહેરના ડૉ. સુભાષ ટેકનિકલ કેમ્પસ ખાતે JEE ની પરીક્ષા લેવામાં આવી હતી. કેન્દ્ર સરકાર દ્વારા જાહેર કરવામાં આવેલા કોરોના સંક્રમણ વાઇરસના દિશા નિર્દેશો અને સૂચનાઓના ચુસ્ત અમલ સાથે આ પરીક્ષા યોજાઇ હતી. જે આગામી રવિવાર સુધી જૂનાગઢના પરીક્ષા કેન્દ્ર પર યોજાશે. જેમાં વિદ્યાર્થીઓની કારકિર્દીલક્ષી પરીક્ષામાં તમામ તકેદારીઓ રાખવામાં આવી રહી છે. તેમજ દિવસ દરમિયાન સવાર અને સાંજ એમ બે તબક્કામાં પરીક્ષાઓ લેવાઇ રહી છે.

જૂનાગઢના ડૉ.સુભાષ ટેકનિકલ કેમ્પસ ખાતે પ્રથમ અને દ્વિતીય ચરણમાં 40- 40 વિદ્યાર્થીઓ પરીક્ષા આપી રહ્યા છે. આગામી છ દિવસ સુધી 454 જેટલા પરીક્ષાર્થીઓ તેમની કારકિર્દીલક્ષી પરીક્ષાઓ આપશે. તે તમામ પરીક્ષાર્થીઓને પરીક્ષા કેન્દ્રમાં પ્રવેશ આપતા અગાઉ તેમનું ટેમ્પરેચર ચેક કરવામાં આવે છે. આ સાથે તમામ વિદ્યાર્થીઓને સેનીટાઈઝર અને પરીક્ષા કેન્દ્રની અંદર માસ્ક ફરજિયાત બનાવવામાં આવ્યું છે. તેની સાથે જે કમ્પ્યુટર લેબમાં વિદ્યાર્થીઓ પરીક્ષા આપશે, તે કમ્પ્યુટર લેબને પણ પ્રથમ અને દ્વિતીય તબક્કાની પરીક્ષા પૂર્ણ થયા બાદ સેનીટાઈઝરની મદદથી જંતુમુક્ત કરવાનું ફરજિયાત બનાવવામાં આવ્યું છે.