- રિજનલ જનરલ મેનેજરે ફરિયાદ નોંધાવતાં કરવામાં આવી ધરપકડ
- 1.30 કરોડ જેટલી ચલણી નોટો મળી આવતા નોંધાઈ પોલીસ ફરિયાદ
- પૂછપરછ દરમિયાન સુનિલ ઘોષે સમગ્ર ગુનાની કરી કબૂલાતઈક્વિટાસ બેન્કના જનરલ મેનેજરે કરી 1.30 કરોડની ઉચાપાત
જૂનાગઢ: ઝાંઝરડા રોડ પર આવેલી ઈક્વિટાસ સ્મોલ ફાઈનાન્સ બેંકના જૂનાગઢ શાખાના મેનેજર સુનિલ ઘોષે બેંકને 1.30 કરોડનો ચૂનો લગાવતા તેની વિરુદ્ધ રિજનલ જનરલ મેનેજર હિમાંશુ ભરખડાએ પોલીસ ફરિયાદ નોંધાવતા જૂનાગઢ બી ડિવિઝન પોલીસે સુનિલ ઘોષની ધરપકડ કરી હતી. ત્યાર બાદ પોલીસની પૂછપરછ દરમિયાન સુનિલ ઘોષે સમગ્ર કારસ્તાન પોતે આચર્યું છે તેનો સ્વીકાર કરી લેતાં પોલીસે સમગ્ર મામલાને ગંભીર માનીને વધુ તપાસ હાથ ધરી છે. પાછલા ત્રણ દિવસથી બેંકમાં નાણાકીય ઉચાપાત થઈ હોવાની ગતિવિધિઓ ચર્ચામાં જોવા મળતી હતી પરંતુ કોઈ નક્કર હકીકત નહીં મળતા સમગ્ર મામલો ગુચવાતો હતો. બેંકના જનરલ મેનેજરે વિધિવત પોલીસ ફરિયાદ દાખલ કરાવતા બેંકમાં રૂપિયાની ઉચાપાતનો કિસ્સો બહાર આવ્યો હતો.
આરોપી પોતાનું પાપ છુપાવવા રોકડને અન્ય જગ્યાએ ખસેડવા માંગતો હતો
સમગ્ર બેંક કૌભાંડનો આરોપી અને સૂત્રધાર જૂનાગઢ બેન્કનો મેનેજર સુનિલ ઘોષ પોતાનું કારસ્તાન છુપાવવા માટે બેંકની આંખોમાં ધૂળ નાંખી રહ્યો હતો. જેના ભાગરૂપે તેમણે બેંકની વડા કચેરી ચેન્નાઇ ખાતે ઈ-મેલ કરીને બેંકનું વોલેટ લિમિટ કરતાં વધી જતા આ રકમને અન્ય બેંકમાં કે અન્ય સ્થળ પર ટ્રાન્સફર કરવાની અરજી કરી હતી. જેને લઇને ચેન્નાઈ સ્થિત બેંકની વડા કચેરીના કેટલાક કર્મચારીઓ જૂનાગઢ ઝાંઝરડા રોડ પર આવેલી ઈક્વિટાસ બેન્કમાં જમા રકમને અન્ય સ્થળે મોકલવા માટેની કામગીરી માટે આવ્યા હતા. જેની તપાસમાં બેંકના કુલ વોલેટની રકમ 1.57.46.280માંથી 1 કરોડ 30 લાખની બાળકોને રમવા માટેની ચલણી નોટો જોવા મળતા બેંક કર્મચારીઓ પણ ચોંકી ગયા હતા અને સમગ્ર મામલાને લઈને રીજનલ જનરલ મેનેજરને તાબડતોબ સુરતથી જુનાગઢ બોલાવ્યા હતા ત્યારે સમગ્ર મામલો પ્રકાશમાં આવ્યો હતો.
