પાકિસ્તાનનું વધુ એક ગતકડું, વીડિયોમાં પાકિસ્તાની વ્યક્તિને જૂનાગઢના વડાપ્રધાન તરીકે નિમણૂક કરાઇની કરી સ્પષ્ટતા

પાકિસ્તાનનું વધુ એક ગતકડું સામે આવ્યું છે. આજથી બે મહિના અગાઉ પાકિસ્તાને નવો નકશો જાહેર કરીને જૂનાગઢ શહેરને પાકિસ્તાનમાં દર્શાવીને પોતાની રાજકીય મહેચ્છા સિદ્ધ કરવાનો પ્રયાસ કર્યો હતો. ત્યારે આજે ફરી એક વખત પાકિસ્તાને પોતાનું પોત પ્રકાશ્યું હોય તે પ્રકારે પાકિસ્તાની વ્યક્તિને જૂનાગઢમાં વડાપ્રધાન તરીકે નિમણૂક કરાવી હોય તેવો વીડિયો સોશિયલ મીડિયામાં વાયરલ કર્યો છે. આ સમગ્ર મામલાને લઈને જૂનાગઢ વાસીઓ પાકિસ્તાનની આ હરકતને બચકાની હરકત ગણાવી રહ્યા છે. કેટલાંક લોકો પાકિસ્તાન સામે સમગ્ર મામલાને લઈને કાર્યવાહી કરવાની પણ માંગ કરી રહ્યા છે.

• પાકિસ્તાને ફરી એક વખત જૂનાગઢને લઈને પોતાનું પોત પ્રકાશ્યું
• પાકિસ્તાની વ્યક્તિને જૂનાગઢના વડાપ્રધાન તરીકે નિમણૂક કરી હોય તેવો વીડિયો વાયરલ
• થોડા મહિના અગાઉ જૂનાગઢને પાકિસ્તાનનો હિસ્સો ગણાવીને સત્તાધીશોએ નકશો પણ વાયરલ કર્યો હતો
• સમગ્ર મામલાને લઈને પાકિસ્તાન વિરૂદ્ધ કાર્યવાહી થાય તેવી જુનાગઢના લોકોની માંગ

જૂનાગઢ : પાકિસ્તાન પોતાની બચકાની હરકતોથી બહાર આવે તેવું લાગતું નથી. છેલ્લાં કેટલાંક વર્ષોથી પાકિસ્તાન ભારતને કોઈના કોઈ બહાને પરેશાન કરવાની એક પણ તક ચૂકતા નથી. ત્યારે છેલ્લા ત્રણ ચાર મહિનાથી પાકિસ્તાન જૂૂનાગઢને લઈને ભારતને પરેશાન કરવાનો નવો કિમીયો શોધી કાઢ્યો છે. આજથી બે ત્રણ મહિના અગાઉ પાકિસ્તાને એક નકશો જાહેર કર્યો હતો. જેમાં જૂનાગઢને પાકિસ્તાનનો હિસ્સો ગણાતા હોય તે પ્રકારે નકશામાં સામેલ કર્યો હતો. જેને લઇને પણ ખૂબ રાજકીય ચર્ચાઓ જોવા મળી હતી.આ સમયે પણ પાકિસ્તાનની આ હરકતને ખૂબ જ નિંદા કરવામાં આવી હતી. પરંતુ પાકિસ્તાન દેશ જાણે કે ન સમજવાની જીદ લઈને બેઠો હોય તે પ્રકારે આજે ફરી એક વખત નવું ગતકડું બજારમાં રમતું કર્યું છે.

પાકિસ્તાની વ્યક્તિને જૂનાગઢના વડાપ્રધાન તરીકે નિમણૂકની કરાઇ જાહેરાત

આ વખતે પાકિસ્તાનથી એક નવો વીડિયો સોશિયલ મીડિયામાં વાઇરલ થયો છે. આ વીડિયોમાં પાકિસ્તાનની કોઈ વ્યક્તિને જૂનાગઢના વડાપ્રધાન તરીકે નિમણૂક કરવાની જાહેરાત કરવામાં આવી છે. પાકિસ્તાનની આ બચકાની હરકતને જૂનાગઢવાસીઓ હવે ગંભીરતાથી લેતા નથી. પરંતુ તેની આ મૂર્ખામી સામે ભારત સરકારે કોઈ આકરા અને કઠોર પગલાં ભરવા જોઈએ, તેવી માંગ જોવા મળી રહી છે.

જૂનાગઢવાસીઓ પાકિસ્તાનના આ ગતકડાને રમુજ ગણાવી

પાકિસ્તાન સતત જૂનાગઢને લઈને પાછલા ત્રણ ચાર મહિનાથી નિવેદનો કરી રહ્યુ છે. પરંતુ જે પ્રકારે પાકિસ્તાનની આ હરકતો હવે ઉગતી ડામી દેવાનો સમય આવી ચૂક્યો હોય તે પ્રકારે જૂનાગઢવાસીઓ પાકિસ્તાનના આ ગતકડાને હવે માત્ર રમુજ ઉપજાવતા હોય તે પ્રકારે જોઈ રહ્યા છે. પરંતુ પાકિસ્તાન વારંવાર આ પ્રકારના ગતકડાં કરવામાંથી બાજ નથી આવી રહ્યું ત્યારે જૂનાગઢના મામલાને લઈને પાકિસ્તાન સામે કોઈ કઠોર સબક શીખવાડવામાં આવે તેવી માંગ પણ જૂનાગઢવાસીઓ ફરી એક વખત કરી રહ્યા છે.