ફિલ્મ ફેર એવોર્ડ વિજેતા રાજકુમાર સંતોષીની જામનગર કોર્ટમાં પેશી

જામનગરઃ કોર્ટમાં ફિલ્મ ફેર એવોર્ડ વિજેતા પ્રોડ્યુસર રાજકુમાર સંતોષી હાજર રહ્યા હતા. જામનગરના ઉધોગપતિને અપાયેલા 9 ચેક બાઉન્સ થતાં કોર્ટમાં કેસ કરવામાં આવ્યો હતો.

સમગ્ર ઘટના વિશે વાત કરીએ, તો રાજકુમાર સંતોષીએ જામનગરના ઉદ્યોગપતિને આપેલા 90 લાખના 9 ચેક બાઉન્સ થયા હતા. ચેક બાઉન્સ થતા ઉદ્યોગપતિ જીતુલાલે ફરિયાદ નોંધાવી હતી. જો કે, 2017થી રાજકુમાર સંતોષી કોર્ટમાં હાજર રહેતા ન હતા. આજે કોર્ટમાં રાજકુમાર સંતોષીની પેશી કરવામાં આવી હતી.

ફિલ્મ પ્રોડ્યુસર રાજકુમાર સંતોષીએ ઘાયલ, ઘાતક જેવી અનેક ફિલ્મો બનાવી છે અને તેઓ ફિલ્મફેર એવોર્ડ વિજેતા પ્રોડ્યુસર છે. જામનગરના ઉદ્યોગપતિ જીતુલાલે પ્રોફેસર રાજકુમાર સંતોષીને આર્થિક સંકડામણમાં મદદ કરી હતી. જો કે, રાજકુમાર સંતોષીએ જીતુલાલને પૈસા આપવાના બદલે ચેક મોકલ્યા હતા, જે ચેક બાઉન્સ થયા હતા. જામનગર કોર્ટમાં રાજકુમાર સંતોષી વિરુદ્ધ નેગોસીએબલ એક્ટ મુજબ કેસ દાખલ કરવામાં આવ્યો હતો. ઉલ્લેખનીય છે કે, રાજકુમાર સંતોષીને આગામી મહિનાની 3જી તારીખની મુદ્દત આપવામાં આવી છે, જેમાં તેમણે ફરી હાજર થવુ પડશે.