ગાંધીનગરઃ રાજ્યના પાટનગરમાં સરકારી નોકરીની લાલચ આપીને કોન્ટ્રાક્ટ પર કામ કરતા કર્મચારીએ કરોડોની ઠગાઈ આચરી છે. આ ઠગે કુલ 27 લોકોને સરકારી નોકરીની લાલચ આપી હતી. આ બેરોજગાર યુવકો પાસેથી કુલ 1 કરોડથી વધુ રુપિયા ખંખેરી લીધા છે. આ ઠગ વિરુદ્ધ સેક્ટર 7ના પોલીસ સ્ટેશનમાં ફરિયાદ દાખલ કરવામાં આવી છે.
સમગ્ર ઘટનાક્રમઃ નવા સચિવાલયમાં અન્ન અને પુરવઠા વિભાગમાં શૈલેષ ઠાકોર નામક ઠગ કોન્ટ્રાક્ટ પર કામ કરે છે. આ ઠગના પરિચયમાં ઝેરોક્ષ મશિન રીપેર કરનાર અમિત ભાવસાર આવ્યા હતા. અમિત ભાવસારને સરકારી નોકરીની લાલચ શૈલેષે આપી હતી. અમિત ભાવસાર આ ઠગ શૈલેષ ઠાકોરે પાથરેલી જાળમાં ફસાઈ ગયો હતો. શૈલેષ ઠાકોર દિલ્હીના આઈએએસ ઓફિસર સાથે પરિચય છે અને સરકારી નોકરી મળી જશે તેમ જણાવ્યું હતું. જો કે આ નોકરી માટે પૈસા લાગશે તેમ જણાવીને પૈસા પડાવ્યા હતા. અમિત ભાવસાર સિવાય અન્ય 27 બેરોજગાર યુવકોને શૈલેષે પોતાની જાળમાં ફસાવીને રોકડા તેમજ ઓનલાઈન ટ્રાન્ઝેક્શન્સ કરાવીને કુલ 1 કરોડ 43 લાખ રુપિયા ખંખેરી લીધા હતા. પૈસા મળી ગયા બાદ યુવકોએ નોકરી માંગતા શૈલેષ બહાના કાઢતો હતો. નોકરવાંચ્છુક યુવકોની ધીરજ ખૂટતા પોલીસ ફરિયાદ કરવામાં આવી હતી.
પોલીસ કાર્યવાહીઃ ગાંધીનગરના સેક્ટર 7 પોલીસ સ્ટેશનમાં અમિત ભાવસારે આરોપી શૈલેષ ઠાકોર વિરુદ્ધ ફરિયાદ નોંધાવી હતી. પોલીસે આઈપીસીની કલમ 406 અને 420 અંતર્ગત કેસ દાખલ કર્યો હતો. પોલીસે શૈલેષ ઠાકોરની સત્વરે અટકાયત કરી લીધી છે. આ કૌભાંડમાં શૈલેષ ઉપરાંત તેના સાથીદારોની પોલીસ તપાસ કરી રહી છે.
કુલ 27 યુવાનો પાસેથી શૈલેષ ઠાકોરે સરકારી નોકરીની લાલચ આપીને કુલ 1 કરોડ 43 લાખ 95 હજાર રોકડા તેમજ ઓનલાઈન ટ્રાન્જેક્શન કરીને પડાવી લીધા હતા. આ મામલે ગાંધીનગર સેક્ટર 7ના પોલીસ સ્ટેશનમાં શૈલેષ ઠાકોર વિરુદ્ધ ફરિયાદ નોંધાઈ છે. પોલીસ શૈલેષ સાથે આ કૌભાંડમાં બીજા કોણ કોણ સામેલ છે તેની તપાસ કરી રહી છે...ડી. એસ. પટેલ(ડીવાયએસપી, ગાંધીનગર)
