વિરોધ પક્ષ કોંગ્રેસ દ્વારા આ મામલે વિરોધ પણ નોંધાવામાં આવ્યો હતો, ત્યારે કોંગ્રેસના કાઉન્સિલરો કમિશનરને રજૂઆત કરવા માટે ગયા હતા. આ ચાર્જ કેવી રીતે લઇ રહ્યા છે તેની માહિતી આપવા પણ જણાવ્યું હતું, પરંતુ મ્યુનિસિપલ કમિશનર જાણે કે મુક્ત બની ગયા હોય તેમ વિપક્ષના વિરોધ વચ્ચે ભાજપના હોદ્દેદારોએ ચાર્જ સંભાળી લીધો હતો.
ગાંધીનગર મહાપાલિકામાં 5 નવેમ્બરના રોજ સામાન્ય સભા મળી હતી. જેમાં મેયર તથા ડેપ્યુટી મેયરની ચૂંટણી યોજવામાં આવી હતી. જે બાદ વિપક્ષ દ્વારા કોર્ટમાં પડકાર આપવામાં આવી હતી. તે સમય દરમિયાન તત્કાલીન મેયર પ્રવિણ પટેલ સામે પક્ષાંતર ધારાનો કેસ ચાલી રહ્યો હતો. પરિણામે કોર્ટ દ્વારા મેયર અને ડેપ્યુટી મેયરની ચૂંટણીને લઈને સ્ટે આપવામાં આવ્યો હતો, પરંતુ તત્કાલીન મેયર પ્રવિણ પટેલે મેયર પદેથી અને કોર્પોરેટર પદેથી રાજીનામું આપ્યા બાદ આ મામલો સરળ બન્યો હતો. પરિણામે ગાંધીનગર મહાપાલિકામાં ચોથા મેયર તરીકે રીટાબેન પટેલે ચાર્જ લીધો હતો. જ્યારે ડેપ્યુટી મેયર તરીકે નાજાભાઈ ઘાઘરે ચાર્જ સંભાળ્યો હતો. ગાંધીનગર મ્યુનિસિપલ કમિશનર રતન કવર ગઢવીએ ભાજપના નવનિયુક્ત મેયર અને ડેપ્યુટી મેયર તરીકે આ બન્નેની જાહેરાત કરી હતી.
ભાજપના બે કોર્પોરેટર મેયર અને ડેપ્યુટી મેયર તરીકે ચાર્જ લઈ રહ્યા હતા ત્યારે કોંગ્રેસ દ્વારા આ બાબતે વિરોધ કરવામાં આવ્યો હતો. કોંગ્રેસના જીતુ રાયકાએ કહ્યું કે ભાજપના કોર્પોરેટરો ચાર્જ સંભાળે તેનાથી અમને કોઈ તકલીફ નથી પડતું. 5 નવેમ્બરની સામાન્ય સભામાં મેયર ડેપ્યુટી મેયરની ચૂંટણી કરવામાં આવી હતી જેના મત ના કવર સામાન્ય સભામાં ખુલવા જોઈએ અને ત્યારબાદ જેની બહુમતી હોય તે ચાર્જ સંભાળી શકે છે, તેનાથી અમને કોઈ તકલીફ નથી પડતો.
આ બાબતને લઈને મ્યુનિસિપલ કમિશનર ડોક્ટર રતનકવર ગઢવીચારણને રજૂઆત કરવામાં આવી હતી, પરંતુ તેમને માત્ર વાયદાઓ બતાવ્યા હતા. પરિણામે કોંગ્રેસના કાઉન્સીલરોએ કમિશનર કચેરીમાં જ અને તેમની ચેમ્બરમાં પડાવ નાખ્યો હતો. જ્યાં સુધી તેમની સમસ્યાનું લેખિત સ્વરૂપમાં સમાધાન ના થાય ત્યાં સુધી બેસી રહ્યા હતા.
એક સમય માટે કમિશનરની ચેમ્બરમાં કાઉન્સિલરોની જવા ઉપર રોક લગાવી દીધી હતી. ત્યારે મહિલા કાઉન્સિલર અને પોલીસ વચ્ચે ઘર્ષણના બનાવો જોવા મળ્યા હતા. કોંગ્રેસના વિપક્ષના નેતા શૈલેન્દ્રસિંહ બિહોલાએ આ બાબતે કમિશનરને પણ કોર્ટમાં લઇ જવાની ચીમકી આપી હતી.
નવા મેયર રીટાબેન પટેલે ચાર્જ લીધા બાદ જણાવ્યું હતું કે, ગાંધીનગરના નાગરિકોની સમસ્યા મારી પહેલી પ્રાથમિકતા રહેશે શહેરને 50 વર્ષ થઈ ગયા છે, ત્યારે ગટર અને પાણીની સમસ્યાને પહેલા પુરી કરવામાં આવશે.
ડેપ્યુટી મેયર નાજાભાઇ ડાંગરે ચાર્જ લીધા બાદ સિવિલ હોસ્પિટલમાં ગરીબ દર્દીઓને ફળફળાદીનું વિતરણ કર્યું હતું અને તેમના ખબર અંતર પૂછ્યા હતા. તેમણે કહ્યું કે ગરીબોની સેવા અને ગાંધીનગરને પુનઃ હરિયાળુ નગર બનાવવા માટે મારા તમામ પ્રયાસ રહેશે.
