દાહોદના સ્વામી વિવેકાનંદ હૉલ ખાતે સંકલિત બાળ વિકાસ સેવા યોજના, મહિલા અને બાળ વિકાસ વિભાગ દ્રારા પોષણ કર્મયોગીઓમાં સુપોષણ અંગે સંવેદના કેળવવા તેમજ વિવિધ યોજનાઓના લાર્ભાથીઓને પોષણકીટ વિતરીત કરવા માટે સુપોષણ ચિંતન સમારોહ તથા આંગળવાડી કાર્યકર અને તેડાગર બહેનોને માતા યશોદા એવાર્ડ વિતરણ તથા સાડી ગણવેશ વિતરણ કાર્યક્રમનું આયોજન કરવામાં આવ્યું હતું.
આ કાર્યક્રમ રાજયકક્ષાના પશુ પાલન અને ગૌસંવર્ધન પ્રધાન બચુભાઇ ખાબડ તથા દાહોદ જિલ્લાના સાંસદથી જશવંતસિંહ ભાભોરની અધ્યક્ષતામાં યોજાયો હતો. ત્યારે દાહોદમાં યોજાયેલા આ કાર્યક્રમમાં રાજયકક્ષાના પ્રધાન બચુભાઇ ખાબડે જણાવ્યું હતું કે, "આંગણવાડી બહેનોએ ગ્રામ્ય વિસ્તારની ઓળખ છે, તેમણે આંગણવાડી બહેનોને આપણા જિલ્લામાં એક પણ બાળક કુપોષિત ન રહે તેવો સંકલ્પ લેવા તથા તેને પૂરો કરવા કહ્યું હતું. પારકાના બાળકને ઉછેરવાની જવાબદારી સરકારે તમને આપી છે. માતા યશોદાની જેમ તમારે તમારી ફરજ નિભાવવાની છે. કુપોષણના કલંકને દૂર કરવા સૌ સાથે મળીને નિષ્ઠાપૂર્વક કામગીરી કરવાની છે.
આ પ્રસંગે સાંસદ જશંવતસિંહ ભાભોરે જણાવ્યું હતું કે, વડાપ્રધાન નરેન્દ્રભાઇ મોદી નવા ભારતના નિર્માણ માટે સતત કાર્યરત છે. ત્યારે દાહોદ જિલ્લાના વિકાસ માટે સૌએ સાથે મળીને પ્રયાસ કરવાના છે. જિલ્લાના કુપોષિત બાળકોની સમસ્યા અંગે કાર્યકર બહેનો પાસે ખૂબ ઊંચી અપેક્ષાઓ છે. આપ સૌ એમાં ખરા ઉતરો તે રીતે કામગીરી કરવાની છે.
ત્યારબાદ જિલ્લા કલેક્ટર વિજય ખરાડીએ જણાવ્યું હતું કે, દરેક આંગણવાડી કાર્યકર બે વાતનું ખાસ ધ્યાન રાખે એક બાળક સમયસર આંગણવાડી ખુલ્લી હોય અને બાળકો 9.30 થી 3.30 સુધી આંગણવાડીમાં હાજર રહે. આ ઉપરાંત બાળકોને ત્રણ સમયનું ભોજન મળે તથા તેમના આધાર લિંક કરવામાં આવે તે જરૂરી હોવાનું સમજાવ્યું હતું. કાર્યક્રમમાં જિલ્લા કક્ષાના માતા યશોદા એવોર્ડ માટે પસંદ થયેલા 21 આંગણવાડી કાર્યકરોને રૂ. 21,000 અને 21 તેડાગર બહેનોને રૂ. 11,000 ના ચેક આપીને સન્માનિત કરવામાં આવ્યા હતા.
