બનાસકાંઠા : મહા સુદ આઠમ એટલે કે આઇશ્રી ખોડીયાર માતાજીનો પ્રાગટ્ય દિન માનવામાં આવે છે. ત્યારે સમગ્ર બનાસકાંઠા જિલ્લામાં ભક્તિભાવથી ખોડિયાર જયંતિની ઉજવણી થઈ હતી. ત્યારે ડીસાના બગીચા વિસ્તારમાં શાકમાર્કેટ સામે આવેલ વર્ષો જુના શ્રી ખોડીયાર માતાજીના મંદિરે ભવ્યાતિભવ્ય રીતે ખોડિયાર જયંતિની ઉજવણી કરાઇ હતી.
બનાસકાંઠા જિલ્લામાં ખોડિયાર જયંતિ ધામધૂમપૂર્વક ઉજવણી કરાઈ
જેમાં વહેલી સવારથી જ મંદિરે દર્શનાર્થીની ભીડ જોવા મળી હતી. તેમજ મંદિરના વહીવટ કર્તાઓ દ્વારા મોટી સંખ્યામાં આવનારા દર્શનાર્થીઓને તકલીફ ન પડે તે માટે વ્યવસ્થા કરાઇ હતી. ડીસા શહેર પોલીસ દ્વારા પણ વિશેષ બંદોબસ્ત ગોઠવાયો હતો. આ પ્રસંગે કુલ 801 કિલો ઘઉં, 801 કિલો ગોળ, 30 ડબ્બા ઘી તેમજ 10 કિલો જેટલી બદામ નાખી મહાપ્રસાદ લાપસી તૈયાર કરી દર્શનાર્થીઓને પ્રસાદ રૂપે અપાઇ હતી. આ પાવન દિવસે ખોડીયાર માતાજીના દર્શન કરી ભક્તોએ ધન્યતા અનુભવી હતી.
