બનાસકાંઠાઃ સરહદી વિસ્તારમાં પાણીની તંગીનો સામનો કરી રહેલા ખેડૂતોને ફાયદો થાય અને સિંચાઈ માટે તેમજ પીવા માટે પૂરતું પાણી મળી રહે તે માટે સરકારે કેનાલ બનાવી છે. પરંતુ કેનાલમાં થયેલા ભ્રષ્ટાચાર અને જે-તે સમયે કોન્ટ્રાક્ટર અને અધિકારીઓએ બેદરકારી દાખવતા હલકી ગુણવત્તાવાળી કેનાલ બનાવતા વારંવાર કેનાલમાં ગાબડા પડી રહ્યા છે. તેથી જ્યારે જ્યારે પાણી છોડવામાં આવે છે, ત્યારે ખેડૂતોના ખેતરમાં પહોંચાડવાની જગ્યાએ કેનાલ તૂટતા ખેતરો જળબંબાકાર થઇ જાય છે.
આ મામલે અગાઉ અનેકવાર રજૂઆતો કરી હોવા છતાં પણ કોઈ જ કાર્યવાહી થઈ નથી અને ખેડૂતોએ પણ આ બાબતે પોતાને થયેલા નુકસાન માટે સરકારમાં રજૂઆત કરવામાં આવી છે. છતાં પણ આજદિન સુધી કોઈ જ પ્રકારની તપાસ કરવામાં આવતી નથી. ખેડૂતો દ્વારા કેનાલમાં સફાઈ ન થતી હોવાના કારણે કેનાલમાં પાણી છોડવામાં આવતા જ કેનાલો તૂટી જાય છે અને જેના કારણે ખેડૂતોનો પાક બગડતા ખેડૂતોને અવાર નવાર નુકસાન ભોગવવાનો વારો આવે છે. આ બાબતે વાવ અને થરાદના ખેડૂતોએ આ બાબતે અનેકવાર આંદોલનો પણ કર્યા છે, છતાં પણ કોઈ જ પ્રકારની કાર્યવાહી કરવામાં આવતી નથી.
આ બાબતે થરાદના ધારાસભ્યએ સોશિયલ મીડિયામાં પોતાની સમસ્યા બતાવવા માટેનું ગૃપ બનાવ્યું છે, જેમાં રોજના 200થી પણ વધુ કેનાલ તૂટવાથી નુકસાનના મેસેજ આવે છે. ત્યારે ખેડૂતોની વારંવાર રજૂઆતના પગલે થરાદના ધારાસભ્ય ગુલાબસિંગ રાજપુતે આ બાબતે સરકારમાં અનેકવાર રજૂઆત કરી હોવા છતાં પણ કોઈ જ કાર્યવાહી ન થતાં તેઓએ હવે લોકાયુક્તમાં ફરિયાદ કરી હતી. થરાદના ધારાસભ્ય ગુલાબસિંહ રાજપૂતે ગુજરાતના મુખ્યપ્રધાન વિજય રૂપાણી, નાયબ મુખ્યપ્રધાન, મુખ્ય કમિશ્નર અને લોકાયુક્તમાં ફરિયાદ કરી તટસ્થ તપાસની માંગ કરી છે. એટલું જ નહીં પરંતુ જવાબદાર અધિકારીઓ અને કોન્ટ્રાક્ટરો સામે કડક કાર્યવાહી કરવાની માંગ સાથે લોકાયુક્ત ફરિયાદ કરી હતી.
