ડીસાઃ બિન સરકારી ગ્રાન્ટેડ શાળાઓમાં સરકાર દ્વારા કરાર આધારિત શિક્ષકોની ભરતી કરવામાં આવે છે. જેમાં શિક્ષકોની 11 માસના કરાર પર ભરતી કરાય છે. ડીસા તાલુકામાં પણ આવી 44 બિન સરકારી ગ્રાન્ટેડ શાળાઓમાં અંદાજિત 250 જેટલા શિક્ષકોની કરાર આધારીત ભરતી કરવામાં આવી છે. જેની સામે શિક્ષકો છેલ્લા ઘણા સમયથી વિરોધ દર્શાવી રહ્યા છે.
ગુજરાત રાજ્ય શૈક્ષણિક સંઘની સંકલન સમિતિ અને બનાસકાંઠા જિલ્લા શૈક્ષણિક સંઘની સંકલન સમિતિ દ્વારા આજે વિવિધ મુદ્દાઓને લઈને આઠમા તબક્કામાં વિવિધ વિરોધ કાર્યક્રમોનું આયોજન કરવામાં આવ્યું છે. આજે ધ્વનિનાદ સાથે તમામ શિક્ષકો, સંચાલકો અને તમામ વહીવટી સ્ટાફ જોડાયો છે. 11 મહિનાના કરાર આધારિત બદલીને સ્થાને કાયમી ભરતી કરવામાં આવશે તો સારા શિક્ષકો મળી શકશે. સારા શિક્ષકો મળશે તો વિદ્યાર્થીઓ ને સારું શિક્ષણ મળશે તેમજ શિક્ષણને આપણે ઉચ્ચ કક્ષાએ લઈ જઈ શકીશુ. દાડીયાત તરીકે અત્યારે જે 11 મહિનાના શિક્ષકોની ભરતી કરવામાં આવે છે તેનો અમે સખત વિરોધ કરીએ છીએ...હરેશભાઈ પવાયા(તાલુકા કન્વીનર, જિલ્લા શિક્ષક સંઘ સંકલન સમિતિ)
કરાર આધારિત ભરતીના ગેરફાયદાઃ શિક્ષકોનું માનવું છે કે 11 માસના કરાર પછી શિક્ષકોને છૂટા કરી દેવાતા તે બેકાર બની જાય છે અને વિદ્યાર્થીઓના શિક્ષણ કાર્ય પર પણ માઠી અસર પડે છે.સરકારે કરેલા જૂના ઠરાવો પણ હજી સુધી અમલમાં મૂક્યા નથી.તેથી આજે ગ્રાન્ટેડ શાળાઓના શિક્ષકોએ તેમની મંગણીઓને લઈ સરકાર સામે પોતાનો રોષ ઠાલવ્યો હતો. ડીસાની આદર્શ હાઇસ્કુલના શિક્ષકોએ સરકાર તાત્કાલિક શિક્ષકોની વાત સાંભળે તે માટે આજે થાળી વગાડી શિક્ષકોએ સરકારને જગાડવાનો પ્રયાસ કર્યો છે.
આ પહેલા શાળાઓમાંથી ભરતી કરી શકતા હતા અને હવે કેન્દ્રીય કૃત ભરતી છે એટલે જે તે નિર્ણયો ત્યાંથી લેવાતા હોય છે એમાં અમે કંઈ કરી શકતા નથી...નરેન્દ્ર સિંહ (જિલ્લા શિક્ષણ અધિકારી, બનાસકાંઠા)
