બાયડ પેટાચૂંટણી: ચૂંટણી પૂર્વે ભાજપને ફટકો, 150થી વધુ કાર્યકરો કોંગ્રેસમાં જોડાયા

બાયડ: સમગ્ર દેશની સાથે સાથે ગુજરાતમાં પણ આગામી 21 ઓક્ટોબરના રોજ પેટાચૂંટણીનું મતદાન થવાનું છે. આ ચૂંટણીને લઈ હાલ ખાલી પડેલી વિધાનસભાની બેઠકોમાં રાજકીય માહોલ ધીમે ધીમે ગતિ પકડી રહ્યો છે. ચૂંટણી સમયે પક્ષાંતરની પ્રક્રિયામાં વેગ આવતો હોય છે, ત્યારે દશેરાના પર્વે જ ભાજપમાં મોટું ગાબડું પડ્યું હોય તેમ ભાજપના 150થી પણ વધુ કાર્યકરો કોંગ્રેસમાં જોડાયા છે.

વિજયાદશમીના પર્વ નિમિતે કોંગ્રેસના ઉમેદવાર જશુભાઈ પટેલના કાર્યાલયનો પ્રારંભ થયો છે. શક્તિ પ્રદર્શન સમા આ કાર્યક્રમમાં કોંગ્રેસના પ્રદેશ અને જિલ્લાના અગ્રણીઓ ઉપસ્થિત રહ્યા હતા. કોંગ્રેસે ભાજપ પર વળતો પ્રહાર કરતા 150થી વધુ ભાજપના કાર્યકરોને તોડવામાં સફળ રહેલી કોંગ્રેસે વિધિવત પાર્ટીમાં પ્રવેશ આપ્યો હતો. કોંગ્રેસે જાણે હિસાબ સરભર કરી લીધો હોય, તેમ કોંગ્રેસ અગ્રણીઓ અને કાર્યકરોએ ભાજપમાં ગાબડું પાડતા ઉત્સાહિત બન્યા હતા.