સાંઈનાથ પીયુસી સેન્ટર આણંદમાં પોલ્યુશન કંટ્રોલ સર્ટિફિકેટ આપવા માટે ખુલ્લી લૂંટ ચલાવતા હોવાની જાણકારી Etv Bharatને મળી હતી, ત્યારે રિપોર્ટર દ્વારા સમગ્ર ઘટનાની ઝીણવટ ભરી તપાસ કરતા સરકારે નિયત કરેલા નિયમને નેવે મૂકી સંચાલક દ્વારા તગડી ફી વસૂલવામાં આવતી હોવાની ચોંકાવનારી માહિતી બહાર આવી હતી.
જે અંગે આણંદ એ.આર.ટી.ઓ પી.એમ ચૌધરીને સમગ્ર ઘટના અંગે Etv Bharat દ્વારા જાણ કરાતા, આરટીઓ અધિકારી હરકતમાં આવ્યા અને સ્થળ તપાસ કરતા આરટીઓના વ્હીકલનું પીયુસીમાં સી. એમ. વી.આર. 1998 ના નિયમ નંબર 116 અન્વયે થયેલ ઓર્ડરમાં જણાવેલા ભાવની સૂચનાઓની અવગણના થતી હોવાનું સામે આવ્યું હતું.
હાલ આરટીઓ ઓફિસર દ્વારા આ એજન્સીને સીલ કરીને એજન્ટને નોટિસ પાઠવવામાં આવી છે, પરંતુ જિલ્લામાં અને રાજ્યમાં અનેક નાના મોટા એજન્ટો પ્રજાને ખુલ્લેઆમ લૂંટી રહી છે. તંત્રએ આવી લૂંટારુ એજન્સી ઉપર લાલ આંખ કરવાની જરૂર હોવાની વાત લોકમુખે ચર્ચાઇ રહી છે.
હાલ આરટીઓ દ્વારા અખબારી યાદી જાહેર કરવામાં આવી છે કે, CMVR 1998 નિયમ નંબર 116 (1) અન્વયે બંદરો અને વાહન વ્યવહાર વિભાગ ગાંધીનગર દ્વારા તારીખ 31 ડિસેમ્બર 2008ના રોજ ઓર્ડર ઈસ્યુ કરીને પીયુસી ટેસ્ટ કરાવવા અંગેની ફીના નિયત કરેલા ભાવ જાહેર કરતા મોપેડ 10 રૂપિયા, ટુ-વ્હીલર 20 રૂપિયા, થ્રી વીલર એલપીજી પેટ્રોલ 25 રૂપિયા, થ્રી વિલર ડીઝલ 25 રૂપિયા, એલ એમ વી 50 રૂપિયા તથા બધા જ મીડિયમ અને હેવી મોટર વ્હીકલ સાધનો ડીઝલ સીએનજી અને અન્યને 60 રૂપિયા નિયત કરવામાં આવે છે. જેથી વાહન ધારકોએ નિયત કરેલા ભાવ કરતાં વધારે દર ચૂકવવા નહીં અને જો કોઈપણ પીયુસી સેન્ટર ધારક કે ડીલર નિયત કરેલ ભાવ કરતા વધારે દરની માંગણી કરે તો સહાયતા પ્રદેશીક વાહન વ્યવહાર અધિકારીને આપ ફરિયાદ કરી શકો છો.
