GCMMFLના ચેરમેન તથા વાઇસ ચેરમેનની ચૂંટણીની તારીખ જાહેર

અમૂલ ડેરી તથા તેની સાથે સંકળાયેલી 18 કો-ઓપરેટિવ દૂધ ઉત્પાદક સંઘ મળી તેના ઉત્પાદનોનું વેંચાણ અને તેના પુરવઠાનું નિયમન કરતી સંસ્થા એટલે ગુજરાત કો-ઓપરેટિંવ મિલ્ક માર્કેટિંગ ફેડરેશન લીમિટેડ (GCMMFL). અમૂલના બ્રાન્ડ નેમ નીચે ઉત્પાદન થતી તમામ પ્રોડક્ટનું સેલ્સ અને માર્કેટિંગ સંભાળતી સંસ્થા જેની સ્થાપના વર્ગીસ કુરિયને કરી હતી.

આણંદ: ગુજરાત કો-ઓપરેટિવ મિલ્ક માર્કેટિંગ ફેડરેશનના ચેરમેન તથા વાઇસ ચેરમેનની આગામી 23 જૂલાઇના રોજ ચૂંટણી યોજાશે. આ ચૂંટણીમાં કુલ 18 સંઘના પ્રતિનિધિ વોટ કરશે જેમાંથી કોઈ એક સહકારી ડેરી સંઘના ચેરમેન GCMMFLના ચેરમેન તથા વાઇસ ચેરમેનના પદ માટે પસંદગી પામશે.

હાલ ખેડા જિલ્લા દૂધ ઉત્પાદક સંઘ (આણંદ/અમુલ) ડેરીના ચેરમેન રામસિંહ પરમાર ગુજરાત કો-ઓપરેટિવ મિલ્ક માર્કેટિંગ ફેડરેશન લિમિટેડના ચેરમેન પદ પર હતાં. સાથે જ ગોધરા ડેરી સંઘના ચેરમેન જેઠાભાઇ ભરવાડ GCMMFLના વાઇસ ચેરમેન તરીકે સેવા આપતા હતાં. હવે આગામી 23 જૂલાઈએ યોજાનારી ચેરમેન તથા વાઇસ ચેરમેનની ચૂંટણીમાં આ ચહેરાઓ પુન:રિપીટ કરવામાં આવે છે, કે ગુજરાત મિલ્ક માર્કેટિંગ ફેડરેશન લિમિટેડની કમાન અન્ય કોઈના હાથમાં આવે છે તે જોવું રહ્યું.