અમદાવાદમાં 'નમસ્તે ટ્રમ્પ'ને લઈ શહેર પોલીસ સજ્જ, શહેરમાં ગોઠવાયો ચાંપતો બંદોબસ્ત

ડોનાલ્ડ ટ્રમ્પના પ્રવાસને લઈ અમદાવાદ શહેરમાં સુરક્ષા સઘન કરવામાં આવી છે. અમેરિકાના રાષ્ટ્રપ્રમુખ અને પીએમ મોદીની 24 ફેબ્રુઆરીની મુલાકાતને લઈ અમદાવાદ ક્રાઈમ બ્રાન્ચે એક્શન પ્લાન તૈયાર કર્યો છે. ટ્રમ્પ અને મોદીની ચૂસ્ત સુરક્ષા વ્યવસ્થા ગોઠવવાની તૈયારીઓ થઈ ગઈ છે. આ અંગે સ્પેશિયલ પોલીસ કમિશનર અજય તોમરે જણાવ્યું કે, ટ્રમ્પના ભારત પ્રવાસને લઈ એજન્સીઓ સતર્ક છે. અમદાવાદ પોલીસ અને વહીવટી તંત્ર માટે આ મોટું આયોજન છે. સિક્રેટ સર્વિસ,SPG, NSG, ATS, ક્રાઇમ બ્રાન્ચ, રેપિડ એક્શન ફોર્સ અને ઇન્ટેલિજન્સ એજન્સીઓ સંકલન સાધીને આ વ્યવસ્થા ગોઠવવામાં આવી રહી છે. તેમજ SRP અને ચેતક કમાન્ડો પણ ફરજ પર રહેશે. આ દરમિયાન મેટલ ડીટેક્ટર અને એન્ટી ડ્રોન ટેકનોલોજીનો પણ ઉપયોગ કરવામાં આવશે. તમામ એજન્સીઓ, AMC, ટ્રાન્સપોર્ટ કમિશ્નર, અધિકારીઓ અને એજન્સીઓ વચ્ચે સંકલન સાથે કામગીરી ચાલી રહી છે. તેમણે કહ્યું કે આ કાર્યક્રમ માટે SPG, NSG, ATS, RAF, ક્રાઈમ બ્રાંચનું સંકલન કરાયું છે.

અમદાવાદ : આ સમગ્ર આયોજનને લઇને અજય તોમરે જણાવ્યું કે અમેરિકાના રાષ્ટ્રપતિ ડોનાલ્ડ ટ્રમ્પના સ્વાગત-સુરક્ષા માટે એરપોર્ટ પર સ્વાગત અને સાંસ્કૃત્તિક કાર્યક્રમ યોજાશે. જો કે, હાલ એરપોર્ટ પર આગમનનો સમય હજુ નક્કી નથી. તેેઓએ વધુમાં જણાવ્યું કે સાબરમતી આશ્રમ અંગે જે હશે તેને આખરી ઓપ આપીશુ. SPG, NSG, ATS, RAF, ક્રાઈમ બ્રાંચના સંકલન હેઠળ હાલ કામગીરી ચાલી રહી છે, ત્યારે રોડ શોના રૂટ પર પુરતી વ્યવસ્થા રાખવામાં આવશે અને ટેકનીકલ તરીકે DRDOના એન્ટી ડ્રોનનો પણ ઉપયોગ કરાશે.

વધુમાં જણાવતા તોમરે કહ્યું કે એક પાસ પર એક જ વ્યક્તિને પ્રવેશ અપાશે. આ સિવાય પાર્કિંગ અંગે જણાવ્યું કે પાર્કિંગની વ્યવસ્થા 2 કિમી સુધીમાં રાખવામાં આવી છે અને તે માટે 3 વિવિધ સ્થળોએ પાર્કિંગની વ્યવસ્થા કરાઈ છે. ટ્રમ્પનું એરપોર્ટ ખાતે સ્વાગત કરવામાં આવશે અને ત્યારબાદ રોડ શો યોજાશે. તેની સાથે સાથે પોલીસે સાબરમતી આશ્રમમાં પણ બંદોબસ્ત ગોઠવ્યો છે અને પોલીસને સાબરમતી આશ્રમના કાર્યકમ રદ થવા અંગે કોઈ માહિતી નથી. સુરક્ષા માટે અમદાવાદ પોલીસ અધિકારીઓ અને કર્મચારીઓ ફરજમાં રહેશે. લેટેસ્ટ ટેકનોલોજી સાથે ગુજરાત પોલીસ સુરક્ષા વ્યવસ્થામાં મદદરૂપ થશે. જ્યારે ડીપ પોઇન્ટ, ધાબા પોઇન્ટ અને બેરિકેડ પણ રાખવામાં આવશે.

જણાવી દઈએ કે 24 ફેબ્રુઆરીએ અમેરિકાના રાષ્ટ્રપતિ ડોનાલ્ડ ટ્રમ્પ અને વડાપ્રધાન નરેન્દ્ર મોદી અમદાવાદ આવશે. તેથી શહેરમાં ચુસ્ત સુરક્ષા બંદોબસ્ત કરવામાં આવી રહ્યા છે. વિશ્વની બે મોટી લોકશાહીના પ્રમુખ અમદાવાદ આવી રહ્યા છે તેથી શહેર પોલીસ દ્વારા મોટું આયોજન કરવામાં આવી રહ્યું છે. જે હેઠળ શહેર પોલીસ દ્વારા તમામ કામગીરીને આખરી ઓપ આપવામાં આવી રહી છે.

અજય તોમરે જણાવ્યું કે સુરક્ષા વ્યવસ્થા સાથે કોઈ કચાશ રાખવામાં નહિ આવે. રાજ્ય સરકાર અને રાજ્ય પોલીસ વડા સીધુ સંકલન કરી રહ્યા છે, ત્યારે શહેર પોલીસ પણ ખેડેપગે રહશે. રૂટ ઉપર પણ મોટી સંખ્યામાં પૂરતી વ્યવસ્થા રાખવામાં આવશે. ધાબા પોઇન્ટ ઉભા કરવામાં આવશે. ઉલ્લેખનીય છે કે ડોનાલ્ડ ટ્રમ્પ આવતા વિશ્વના સૌથી મોટા ક્રિકેટ સ્ટેડિયમમાં કાર્યક્રમ યોજાશે. તેથી શહેર પોલીસ દ્વારા આસપાસમાં રહેતા લોકોને કોઈ અગવડ ન પડે તે પણ તકેદારી રાખવામાં આવી રહી છે.