ગાંધી@150: PM મોદી પહોંચ્યા ગાંધી આશ્રમ, બાપુને શ્રદ્ધાસુમન અર્પણ કર્યા

અમદાવાદ: સમગ્ર દેશ 2 ઓક્ટોબર ગાંધીજીની 150મી જન્મજયંતી ઉજવી રહ્યો છે, ત્યારે વડાપ્રધાન નરેન્દ્ર મોદી અમદાવાદની મુલાકાતે આવી પહોંચ્યા છે. આ પ્રસંગે PM મોદી અમદાવાદમાં ગાંધી આશ્રમની  મુલાકાતે પહોંચ્યા છે. તેમના આગમનને કારણે ગાંધી આશ્રમમાં સ્વાગતની તડામાર તૈયારી થઈ ગઈ છે. આ સાથે જ PM મોદી રિવરફ્રન્ટ ખાતે 20 હજાર સરપંચને સંબોધશે. આ ઉપરાંત નવરાત્રી નિમિતે GMDC ગ્રાઉન્ડમાં યોજનાર ગરબા કાર્યક્રમમાં પણ હાજરી આપશે.

વડાપ્રધાન નરેન્દ્ર મોદી અમદાવાદ આવી પહોંચ્યા છે, અમદાવાદ ઍરપોર્ટ પર સંબોધન બાદ ગાંધી આશ્રમ પહોંચી તેમણે બાપૂને શ્રદ્ઘાસુમન અર્પણ કર્યા છે.

• વડાપ્રધાન મોદી ગાંધી જયંતીએ આજે સાંજે 6 કલાકે અમદાવાદ એરપોર્ટ પર આવશે.
• મુખ્યપ્રધાન વિજય રૂપાણી, રાજ્યપાલ આચાર્ય દેવવ્રત, ગૃહ રાજય પ્રધાન પ્રદીપસિંહ જાડેજા, મેયર બિજલ પટેલ સ્વાગત કરશે.
• સાંજે 6.45 કલાકે ગાંધી આશ્રમની મુલાકાત લઈને બાપુની પ્રતિમાને પુષ્પાંજલી અર્પણ કરશે.
• ગાંધીઆશ્રમની મુલાકાત બાદ મગન નિવાસ ચરખા ગેલેરીની મુલાકાત લેશે.
• આ પ્રવૃત્તિ સાથે જોડાયેલાં 5 બાળકો સાથે તેઓ વાત કરશે.
• હ્રદયકુંજ ખાતે મહાત્મા ગાંધીજીની પ્રતિમાને સુતરની આંટી પહેરાવીને શ્રદ્ધાંજલી અર્પણ કરશે.
• ગાંધી જયંતીનાં દિને રિવરફ્રન્ટ પર 20 હજાર સરપંચોનું સંમેલન થવાનું છે. જેમાં 10 હજાર ગુજરાતનાં અને 10 હજાર અન્ય રાજ્યનાં સરપંચો પણ હાજર રહેશે.
• આ કાર્યક્રમ માટે આફ્રિકન દેશોનાં પ્રતિનિધીઓને પણ આમંત્રણ આપવામાં આવ્યું છે. તેમજ રાજ્યોના સરપંચો અને કાર્યકરોને આંમત્રણ આપવામાં આવ્યું છે.
• ગુજરાતભરમાંથી 10 હજાર જેટલા સરપંચો અને સ્વચ્છતા કાર્યક્રમ સાથે જોડાયેલા કાર્યકરો આવશે.
• અન્ય રાજ્યોના સરપંચોને મહેસાણા, સુરત અને વડોદરા ઝોનમાં શૌચમુક્ત મોડલ ગામોની અને ગાંધી હેરિટેજ સાઇટ્સ અને સ્ટેચ્યૂ ઓફ યુનિટીની વિઝિટ કરાવાઈ રહી છે.
• PM મોદી રિવરફ્રન્ટના કાર્યક્રમમાં 20 હજાર સરપંચોને સંબોધશે.
• હાલ ગુજરાત નવરાત્રીના રંગે રંગાયેલું છે, ત્યારે વડાપ્રધાન મોદી GMDCના વાયબ્રન્ટ ગરબામાં ભાગ લેશે.
• રાત્રે 8-30 કલાકે મેદાનમાં પહોચી માં અંબાની આરતી કરશે
• 9:00 અમદાવાદ એરોપોર્ટ જવા રવાના થશે