અમદાવાદ : અમદાવાદમાં વિશ્વ હિન્દુ પરિષદ અને બજરંગ દળે ડ્રગ્સ સપ્લાયર ઝડપી પાડ્યો છે. હાલમાં વિશ્વ હિન્દુ પરિષદ અને બજરંગ દળ અલગ અલગ હોટલમાં વિધર્મી યુવકોને પકડવાની કામગીરી કરવાનો પ્રયાસ કરી રહી છે. તેવામાં બુધવારે વિશ્વ હિન્દુ પરિષદ નેતાને બાતમી મળી હતી કે એક યુવતી સાથે વિધર્મી યુવક નહેરુનગરની હોટલમાં આવ્યો છે. જેથી વિશ્વ હિન્દુ પરિષદ અને બજરંગ દળે સંયુક્ત રીતે હોટલમાં તપાસ કરવા પહોંચતાં યુવતી અને યુવક નાસી ગયા હતાં. જોકે યુવક તેનો મોબાઈલ ભૂલી જતા તે મોબાઈલ પર એક શખ્સનો ફોન આવ્યો અને તે શખ્સને પકડી તપાસ કરતા તેની પાસેથી ડ્રગ્સ મળી આવ્યું છે. જેથી આ અંગે એલીસબ્રિજ પોલીસ મથકે ફરિયાદ નોંધાઈ છે. પોલીસે ગુનામાં શામેલ એક યુવકને ડ્રગ્સ સાથે ઝડપી તપાસ શરૂ કરી છે.
મને માહિતી મળતાં અમે હોટલમાં પહોંચ્યા હતા જ્યાં યુવક અને યુવતી મળી આવ્યાં હતાં. જોકે યુવતી અમારી સાથે બોલાચાલી કરતી હતી અને જે બાદ યુવક અને યુવતી બંને ફરાર થઈ ગયાં હતાં. અમે યુવકના ફોનના આધારે આ ડ્રગ્સ સાથે યુવકને પકડી લીધો હતો..હિતેન્દ્રસિંહ રાજપૂત(વિશ્વ હિન્દુ પરિષદના પ્રવક્તા)
ટ્રેપ ગોઠવીને પકડી પાડ્યો : વિશ્વ હિન્દુ પરિષદના પ્રવક્તા હિતેન્દ્રસિંહ રાજપૂતને કોઇ વ્યક્તિએ ફોન કરી વિધર્મી યુવક યુવતીને લઈને નહેરુનગરની હોટલમાં આવી રહ્યો હોવાનું જણાવતા તેઓ બજરંગ દળના કાર્યકરો સાથે હોટલમાં પહોંચ્યા હતાં. જ્યાં એક યુવતી નશાની હાલતમાં મળી આવી હતી. તે યુવતી અને તેની સાથેનો યુવક ત્યાંથી ફરાર થઈ ગયો હતો. જોકે ભાગી ગયેલા યુવકનો ફોન બજરંગ દળના કાર્યકરના હાથમાં આવી ગયો હતો. જે ફોન પર થોડી જ વારમાં એક અજાણ્યા વ્યક્તિએ ફોન કરી માલ લેવા આવ્યા છીએ તેમ જણાવ્યું હતું. જેથી તે પાલડી પાસે આવતા તેને ટ્રેપ ગોઠવીને પકડી પાડ્યો હતો.
આ અંગે સલમાન પઠાણ નામમાં ડ્રગ્સ સપ્લાયરની ધરપકડ કરવામાં આવી છે. આ આરોપી કેટલા સમયથી ડ્રગ્સની હેરાફેરી કરતો હતો અને તે કોની પાસેથી ડ્રગ્સ લાવ્યો હતો અને કોને કોને વેચતો હતો તેમજ હોટલમાં જે યુવકને ડ્રગ્સ આપવા માટે આવ્યો હતો તે ડ્રગ્સ પેડલર છે કે ગ્રાહક તેમજ તેની સાથેની યુવતી કોણ છે અને તેણે કયો નશો કર્યો હતો તે તમામ પાસાઓ પર પોલીસે તપાસ શરૂ કરવામાં આવી રહી છે...બી.જી. ચેતરીયા(એલીસબ્રિજ પોલીસ સ્ટેશનના પીઆઈ)
એનડીપીએસની એક્ટ હેઠળ ગુનો : તે યુવકને ઝડપી મેથીપાક ચખાડીને બજરંગ દળના કાર્યકરોએ તપાસ કરતાં તેની પાસેથી ડ્રગ્સની પડીકી મળી હતી. આ ઘટના અંગે એલીસબ્રિજ પોલીસને જાણ થતા પોલીસે સ્થળ પર પહોંચીને તપાસ કરતા 40 મીલીગ્રામ ડ્રગ્સ મળી આવતા તેને પકડી પોલીસ મથકે લાવી આ અંગે એનડીપીએસની એક્ટ હેઠળ ગુનો નોંધી આરોપીની ધરપકડ કરી છે.
ડ્રગ્સ સપ્લાયરની ધરપકડ : આ મામલે એલીસબ્રિજ પોલીસે સલમાનખાન પઠાણ નામના ડ્રગ્સ સપ્લાયરની ધરપકડ કરી છે. તેમજ બે શખ્સો જેમાં ઉર્વીશ ચૌહાણ અને જાવેદ નામના યુવક છે તે આરોપીને વોન્ટેડ જાહેર કરી પકડાયેલા યુવકની વધુ પૂછપરછ હાથ ધરી છે.
