અમદાવાદ : દુબઈમાં બેસીને ક્રિકેટ સટ્ટાનું નેટવર્ક ચલાવનાર રાકેશ રાજદેવ અને ટોમી ઉંજા અમદાવાદમાં ઝડપાયેલા સટ્ટા કેસમાં સંડોવાયેલા હોવા અંગે ક્રાઈમ બ્રાન્ચે તપાસ શરૂ કરી છે. ક્રાઈમ બ્રાન્ચે ચાંદખેડામાં બંગલોમાંથી ઝડઆરોપી બુકી મહાદેવ અને રાકેશ રાજદેવની તપાસ તેજ બની છે.પેલાં સટ્ટા કેસમાં આરોપીઓના તાર દુબઈ સુધી પહોંચ્યા છે. તેવામાં ક્રાઈમ બ્રાન્ચે આ ગુનામાં સામેલ અન્ય આરોપીઓને પકડવા કવાયત હાથ ધરી છે.
પહેલાં પણ સટ્ટા કેસમાં સંડોવણી : અગાઉ 1400 કરોડના સટ્ટા કેસમાં પણ રાકેશ રાજદેવ સાહિતના ઇન્ટરનેશનલ બુકીઓના નામ સામે આવ્યા હતા ત્યારે આ કેસમાં પણ તેજ આરોપીઓનું કનેક્શન નીકળતા તપાસ તેજ કરાઈ છે. ખાસ કરીને માધવપુરામાં ઝડપાયેલા 10 હજાર કરોડના સટ્ટા કેસમાં જે મહાદેવનું નામ સામે આવ્યું હતું તેના આ ગુનામાં મુખ્ય આરોપીઓ સાથે સંપર્ક હોવાની બાબત પ્રાથમિક તપાસમાં સામે આવી છે જે બાબતને લઈને ક્રાઈમ બ્રાન્ચે પૂછપરછ હાથ ધરી છે.
આ પણ વાંચો Ahmedabad Crime : ચાંદખેડામાં બંગલો ભાડે રાખી દુબઈથી કનેક્શનું IPL સટ્ટા રેકેટ ઝડપાયું, 12ની ધરપકડ
12 આરોપીની ધરપકડ : અમદાવાદ શહેર ક્રાઈમ બ્રાન્ચે દુબઈ સાથે જોડાયેલા IPL T-20 ક્રિકેટ મેચના સટ્ટાના કનેક્શનનો પર્દાફાશ કરી ચાંદખેડાના એક બંગલામાંથી 12 શખ્સોની ધરપકડ કરી છે. રાજસ્થાન અને ઉત્તરપ્રદેશના આરોપીઓની તપાસમાં મોટા ખુલાસાઓ સામે આવ્યા છે. અમદાવાદ ક્રાઈમ બ્રાન્ચે ચાંદખેડા વિસ્તારમાં આવેલા રોયલ ઓર્ચીડ બંગલોઝમાં 7 નંબરના બંગલામાંથી રાજસ્થાનના ભવરલાલ ચૌધરી, અશોકરામ સૈન, અશોકદાસ સંત, ભીયારામ ડુકિયા, પ્રકાશ ઉર્ફે મુન્નો માળી, કિશનલાલ જાટ, આસુરામ ચૌધરી, ઘેવરચંદ જાટ, કેશારામ ચૌધરી, રાજેન્દ્ર પ્રજાપતિ તેમજ ઉત્તરપ્રદેશના સુનિલકુમાર ગૌતમ અને દિલીપકુમાર ગૌતમ નામના આરોપીઓની ધરપકડ કરી છે.
પોલીસે કબજે કરેલી સામગ્રી : આ સમગ્ર મામલે ક્રાઈમ બ્રાન્ચે આરોપીઓ પાસેથી 26 મોબાઈલ ફોન, રોકડ રકમ, યુએઈની પાંચ ચલણી નોટો, નેપાળની એક ચલણી નોટ, ચાર લેપટોપ, સાત આધાર કાર્ડ અને ક્રિકેટ સટ્ટાના વ્યવહારોની નોંધના 9 ચોપડા એમ કુલ મળીને 4 લાખ 84 હજારથી વધુની કિંમતનો મુદ્દામાલ કબજે કર્યો છે.
સટ્ટા ખેલવાની મોડસ ઓપરેન્ડી : આ ગુનામાં મુખ્ય આરોપી રવિન્દ્ર ઉર્ફે રવિ માલી, દિલીપ સોલંકી તેમજ જીતુ માલીએ ભેગા મળી પકડાયેલા આરોપીઓને દુબઈ ખાતે ક્રિકેટ મેચના જુગાર રમવા માટે ઓનલાઈન વેબસાઈટ તેમજ માસ્ટર આઇડી બનાવી, જેના દ્વારા ગ્રાહકોની આઇડીઓ બનાવી આપી અલગ અલગ રકમને અન્ય વ્યક્તિઓના નામના ખોટા બેંક એકાઉન્ટ ખોલાવી તે બેન્ક એકાઉન્ટમાં રકમ જમા કરાવી તેમજ હારજીતના નાણાની રકમ જમા કરાવતા હતા. અમુક રકમ જમા થાય તે રકમ અન્ય બેંકમાં ટ્રાન્સફર કરી તેના સાગરીતો સાથે વર્ચ્યુઅલ નંબરના વ્હોટ્સએપ કોલથી સંપર્કમાં રહી આર્થિક લાભ મેળવી ક્રિકેટ મેચના સટ્ટાના જુગારનું મોટું રેકેટ ચલાવતા હોવાનો ખુલાસો થયો છે.
ગાંધીનગર એલસીબીની રેઇડ : આરોપીઓ પૈકી રવિન્દ્ર ઉર્ફે રવિ માલી દિલીપ સોલંકી તેમજ જીતુ માલી દ્વારા ક્રિકેટ મેચના સટ્ટાનું રેકેટ ચલાવવામાં આવતું હતું. જે બાબતે થોડા દિવસ અગાઉ ગાંધીનગર જિલ્લા એલસીબી દ્વારા રેઇડ કરીને કાયદેસરની કાર્યવાહી કરી હતી. જે કેસમાં બંને આરોપીઓ વોન્ટેડ છે.
દુબઈમાં ટ્રેનિંગ આપી તૈયાર કર્યો સ્ટાફ : રવિન્દ્ર ઉર્ફે રવિ માલી તથા જીતુ માલીએ ભેગા મળીને ક્રિકેટ મેચના જુગારનું રેકેટ ચલાવવા માટે ચાંદખેડામાં બંગલો ભાડેથી રાખ્યો હતો. ઓનલાઇન વેબસાઈટ પરથી બનાવેલી માસ્ટર આઇડીના આધારે ગ્રાહકોને જુદા જુદા નામના આઈડીઓ બનાવવા માટે દુબઈમાં ટ્રેનિંગ આપી તૈયાર કર્યા હતા. રાજસ્થાન તથા ઉત્તરપ્રદેશના છોકરાઓને ભાડાના બંગલામાં રહેવા અને જમવાની સગવડ કરી આપી હતી. તેઓને લેપટોપ, મોબાઈલ તેમજ ડમી બેન્ક એકાઉન્ટ નંબરો આપી ગ્રાહકોને બનાવી આપેલ આઇડી પેટે મેળવેલી રકમ ડમી એકાઉન્ટમાં જમા કરાવતા હતાં.
બેંક એકાઉન્ટ નંબરની તપાસ : આ સમગ્ર મામલે અમદાવાદ ક્રાઈમ બ્રાન્ચે આરોપીઓ સામે ગુનો દાખલ કરી ઝડપાયેલા 12 આરોપીઓને કોર્ટમાં રજૂ કરીને 27મી એપ્રિલ સુધીના રિમાન્ડ મેળવ્યા છે. તેમજ વોન્ટેડ આરોપી રવિન્દ્ર ઉર્ફે રવિ માલી તેમજ જીતુ માલીને શોધવા માટે અલગ અલગ ટીમો કામે લગાડવામાં આવી છે. આ મામલે ઉપયોગમાં લેવામાં આવેલ બેંક એકાઉન્ટ નંબરની માહિતી મેળવવાની કાર્યવાહી અમદાવાદ ક્રાઈમ બ્રાન્ચે શરૂ કરી છે.
