નાગપુર : ભારત અને ઓસ્ટ્રેલિયા વચ્ચે 9 ફેબ્રુઆરીથી ચાર ટેસ્ટ મેચની શ્રેણી શરૂ થઈ રહી છે. રોહિત શર્માની સુકાનીપદની સાથે લોકોનું ધ્યાન ટેસ્ટ શ્રેણીમાં વ્યક્તિગત પ્રદર્શન પર પણ રહેશે. આ દરમિયાન રોહિત શર્મા ટીમ ઈન્ડિયાને ટેસ્ટ ક્રિકેટમાં નંબર વન બનાવવાની સાથે સાથે વ્યક્તિગત રીતે સારું પ્રદર્શન કરવાનો પ્રયાસ કરશે. જો રોહિત આમ કરવામાં સફળ રહેશે તો ટીમ ઈન્ડિયા ત્રણેય ફોર્મેટમાં નંબર 1 ટીમ બની જશે.
ભારતીય ટીમ પર બીજી સિરીઝ જીતવાનું દબાણ છે : ટીમ ઈન્ડિયા છેલ્લા 11 વર્ષમાં ઘરઆંગણે કોઈ ટેસ્ટ સિરીઝ હારી નથી અને તેથી જ ભારતીય ટીમ પર બીજી સિરીઝ જીતવાનું દબાણ છે, જોકે ઓસ્ટ્રેલિયાની ટીમ અહીં સિરીઝ જીતવા માટે અલગ રીતે તૈયારી કરી રહી છે. સ્પિન પિચો પર પ્રેક્ટિસ કરવાની સાથે તે 'અશ્વિન' જેવા સ્પિન બોલર સાથે પણ પ્રેક્ટિસ કરી રહી છે.
આ પણ વાંચો : Junagadh Spinner Mahesh Pithia : ખેડૂતના પુત્રએ ઓસ્ટ્રેલિયાના બેટ્સમેનોનો નિકાળ્યો દમ, જાણો તેની કહાની
ત્રણ શ્રેણીથી ચાલુ છે ટીમ ઈન્ડિયા પ્રભુત્વ : તમને યાદ હશે કે ઈંગ્લેન્ડે છેલ્લી વખત 2012માં ભારતને 2-1થી હરાવીને ટેસ્ટ શ્રેણી જીતી હતી. ત્યારપછી ભારત ટેસ્ટ મેચ રમવા આવેલી કોઈપણ ટીમ ભારતને હરાવી શકી નથી. બીજી તરફ જો ઓસ્ટ્રેલિયન ટીમની વાત કરીએ તો છેલ્લા 19 વર્ષથી ઓસ્ટ્રેલિયન ટીમ ભારતીય ધરતી પર એકપણ ટેસ્ટ શ્રેણી જીતી શકી નથી. આટલું જ નહીં, ભારતે છેલ્લી ત્રણ શ્રેણીમાં પોતાનો દબદબો જાળવી રાખ્યો છે અને સતત ચોથી શ્રેણી જીતીને ઓસ્ટ્રેલિયાને આ જ રીતે જવાબ આપવા માંગે છે.
રોહિત શર્મા પર દબાણ રહેશે : જો રોહિત શર્માની વાત કરીએ તો રોહિત શર્માએ અત્યાર સુધી ટેસ્ટ મેચોમાં કુલ 8 સદી ફટકારી છે જેમાંથી 7 સદી ફક્ત હોમ પિચો પર જ ફટકારી છે. જો છેલ્લા દોઢ વર્ષના આંકડાઓ પર નજર કરીએ તો રોહિત શર્મા છેલ્લા 16 મહિનામાં એક પણ ટેસ્ટ સદી ફટકારી શક્યો નથી. રોહિત શર્માની છેલ્લી સદી સપ્ટેમ્બર 2021માં ઓવલ ખાતે રમાયેલી ટેસ્ટ મેચ દરમિયાન બની હતી. તેણે ઈંગ્લેન્ડ સામે રમતા આ સદી ફટકારી હતી. ટી-20 વર્લ્ડ કપની સેમિફાઇનલમાં હાર્યા બાદ રોહિતના સ્થાને હાર્દિક પંડ્યાને ટી-20 મેચોની કપ્તાની સોંપવામાં આવી છે. બીજી તરફ રોહિત શર્મા ટેસ્ટ અને વન-ડે ટીમનો નિયમિત કેપ્ટન બની ગયો છે, પરંતુ જો ટેસ્ટ મેચોમાં તેનું વ્યક્તિગત પ્રદર્શન સુધરતું નથી અને 4 ટેસ્ટ શ્રેણીનું પરિણામ અપેક્ષા મુજબ નથી આવતું તો ટેસ્ટ મેચોમાં તેની કેપ્ટનશીપ જોખમ હેઠળ હોઈ શકે છે.
આ પણ વાંચો : IND vs AUS Irfan Pathan : પૂર્વ ભારતીય ક્રિકેટરે ઓસ્ટ્રેલિયાને આપી ચેતવણી, આ બોલર બનશે મોટો ખતરો
રોહિત શર્માએ ટેસ્ટ મેચમાં કેપ્ટન તરીકે કુલ 2 મેચ રમી છે : રોહિત શર્મા આ ટેસ્ટ મેચ સિરીઝમાં વધુ એક આંકડો પૂરો કરી શકે છે. જો તે ચાર મેચની ટેસ્ટ શ્રેણીમાં 240 રન બનાવશે તો તે ઘરઆંગણે ટેસ્ટ મેચોમાં 2000 રન પુરા કરનાર પ્રથમ ખેલાડી બની જશે. રોહિત શર્માએ ઓસ્ટ્રેલિયા સામેની સાત ટેસ્ટ મેચમાં 31.38ની એવરેજથી કુલ 460 રન બનાવ્યા છે. રોહિત શર્માએ ટેસ્ટ મેચમાં કેપ્ટન તરીકે કુલ 2 મેચ રમી છે અને બંને મેચ જીતી છે. જોકે આ બંને મેચમાં રોહિત શર્મા માત્ર 90 રન જ બનાવી શક્યો છે. એટલા માટે તેની પાસેથી પણ મોટી ઇનિંગ્સની જરૂર છે. હાલમાં બંને ટીમો પ્રેક્ટિસ સેશનમાં પરસેવો પાડી રહી છે. નાગપુર પહોંચેલા ભારતીય ખેલાડીઓએ શુક્રવારે પુષ્કળ પરસેવો પાડ્યો અને ઝડપી બોલિંગ કરતાં સ્પિન બોલિંગની વધુ પ્રેક્ટિસ કરી.
