રાજકોટમાં હાઇડ્રોક્સીક્લોરોકવીન દવાના બે ઘટકનું હડમતાળાની ફેક્ટરીમાં થઈ રહ્યું છે ઉત્પાદન

કોરોના વાઈરસનું મુળ શોધવા સમગ્ર વિશ્વ મથે છે ત્યારે હાલ ભારતમાં બનતી હાઇડ્રોક્સીક્લોરોકવીન દવાનો ઉપયોગ કોરોના દર્દી માટે આશાનું કિરણ બન્યું છે. સમગ્ર વિશ્વમાંં આ દવાની માગ વધી રહી છે અને કેન્દ્ર સરકાર દ્વારા પણ વધુમાં વધુ ઉત્પાદન થાય તેવા પ્રયાસો કરવા સૂચન કરાયું છે. જે અંતર્ગત ગોંડલ તાલુકાના હડમતાળા જી.આઈ.ડી.સી.માં આવેલા અલ્કેશભાઇ ગોસલીયાની પારમેક્સ ફાર્મા લિમિટેડ કંપનીમાં હાઇડ્રોક્સીક્લોરોકવીન ટેબલેટ બનાવવાના ઉપયોગમાં આવતાં નોવેલડાયામાઇન તેમજ અન્ય એક ઘટક બનાવવામાં આવી રહ્યા છે.

રાજકોટઃ ગોંડલ તાલુકાના હડમતાળા જી.આઈ.ડી.સી.માં આવેલા રાજકોટ રહેવાસી અલ્કેશભાઇ ગોસલીયાની પારમેક્સ ફાર્મા લિમિટેડ કંપનીમાં હાઇડ્રોક્સીક્લોરોકવીન ટેબલેટ બનાવવાના ઉપયોગમાં આવતાં નોવેલડાયામાઇન તેમજ અન્ય એક ઘટક બનાવવામાં આવી રહ્યું છે. જે કેડીલા (ZYDUS) કંપનીને પહોંચાડવામાં આવશે એક મહિનામાં ઓછામાં ઓછો આશરે સાતથી આઠ ટન મટીરીયલ તૈયાર કરી પહોંચાડવાનો ઓર્ડર મળી ચૂક્યો છે.

અલ્કેશભાઇ ગોસલીયા પારમેક્સ ફાર્મા લિમિટેડ કંપનીના માલિક

આ તકે અલ્કેશભાઇ ગોસલીયાએ જણાવ્યું હતું કે, ભારત અને સમગ્ર વિશ્વ પર કોરોનાની આફત આવી ચૂકી છે દેશનો નાનામાં નાનો નાગરિક સૈનિકની જેમ લડી રહ્યો છે ત્યારે અમારી પણ ફરજ છે કે અમે વધુ ને વધુ દવાના ઘટકનું ઉત્પાદન કરી દેશસેવા નિભાવીએ અમારી પાસે થોડી ટેકનોલોજીની અછત હતી જે કેડીલા કંપની દ્વારા પૂર્ણ કરવામાં આવી છે. કંપનીના ત્રણ વૈજ્ઞાનિકો બાર દિવસ પારમેક્સ ફાર્મમાં રોકાઈ કંપનીને ટેકનોલોજીથી સજ્જ કરી ચુક્યા છે. અમોને પણ દેશ સેવા કરવાનો મોકો મળ્યાનું ગૌરવ છે. જીવનમાં હંમેશા પૈસા જ મહત્વના નથી હોતા, દેશ સેવા પણ મહત્વની હોય છે. તે માટે મારી સમગ્ર ટીમે કમર કસી છે.જિલ્લામાં દવા બનાવતી ઘણી કંપનીઓ અને ફેક્ટરીઓ છે પરંતુ હાઇડ્રોક્સીક્લોરોકવીનના ઘટકો બનાવતી એકમાત્ર પારમેક્સ કંપની છે, આ ઉપરાંત ઘણા ડ્રગ ઇન્ટરમિડીયેટ બનાવવામાં આવે છે જે ટોરેન્ટ ફાર્મા, સન ફાર્મા, એચએલએલ ( ગવર્મેન્ટ ઓફ ઇન્ડિયા)ને પણ સપ્લાય કરવામાં આવી રહ્યા છે.