રાજકોટઃ હાલ રાજ્યમાં અલગ-અલગ જિલ્લાઓમાં શાળાઓમાં પણ કોરોના પોઝિટિવ કેસ વિદ્યાર્થીઓમાં અને શિક્ષકોમાં જોવા મળી રહ્યા છે, ત્યારે આ કોરોના વધુ પ્રમાણમાં ફેલાય નહીં તેના માટે હવે તંત્ર એલર્ટ થઈ ગયું છે. જ્યારે રાજકોટમાં પણ છેલ્લા ત્રણ દિવસમાં 5 જેટલા વિદ્યાર્થીઓને કોરોના પોઝિટિવ (Rajkot school corona cases ) આવ્યો છે. ત્યારે રાજકોટમાં કોરોના સંક્રમણ (Corona in Rajkot) વધુ પ્રમાણમાં ફેલાય નહીં તે માટે તંત્ર દ્વારા અનેક કાર્યવાહી કરવામાં આવી રહી છે. જેમાં વિવિધ ખાનગી શાળાઓમાં સ્કુલ વાહનમાં લઇ જવાતા બાળકો જે ઘેટાં-બકરાની જેમ ભરેલા હોય છે. આવા સ્કૂલ વાહન ચાલકો સામે રાજકોટ RTO ડ્રાઇવ યોજીને કાર્યવાહી કરી રહી છે.
8 જેટલા સ્કૂલ વાહનો જપ્ત
રાજકોટમાં ખાનગી શાળાઓમાં જતા વિદ્યાર્થીઓને સ્કૂલ વાહનમાં ઠસોઠસ ભરીને લઈ જવાની ઘટનાઓ પ્રકાશમાં આવી છે, ત્યારે આ મામલે રાજકોટ RTO દ્વારા ડ્રાઇવ યોજવામાં આવી હતી. જેમાં 8 જેટલા સ્કૂલ વાહનો જપ્ત કરવામાં આવ્યા છે. તેમજ શહેરમાં હવે વિવિધ ખાનગી શાળાઓમાં જતા સ્કૂલ વાહનો પર RTO દ્વારા નજર રાખવામાં આવશે અને કેપેસીટિ કરતા વધુ પ્રમાણમાં જો વિદ્યાર્થીઓને બેસાડવામાં આવશે તો આ સ્કૂલ વાહન ચાલકો સામે દંડાત્મક કાર્યવાહી પણ કરવામાં આવશે.
રૂ. 5 હજાર કરતા વધુનો દંડ
રાજકોટ RTOના ઈન્ચાર્જ એમ.ડી પાનસૂરિયા (RTO IN charge on corona drive) એ જણાવ્યું હતું કે, રાજકોટમાં શાળાઓમાં કોરોનાના કેસ વધવા માંડ્યા છે, ત્યારે અમારા ધ્યાન પર આવ્યું હતું કે, સ્કૂલ વાહનોમાં તેની કેપેસીટિ કરતા વધુ બાળકોને બેસાડીને શાળાએ લઈ જવામાં આવે છે. જે અંગે અમે ડ્રાઇવ યોજી હતી અને સવારથી બપોર સુધીમાં 8 જેટલા અલગ અલગ સ્કૂલ વાહનોને પણ જપ્ત કર્યા છે. જ્યારે વાલીઓએ પણ આ પ્રકારની પરિસ્થિતિમાં ધ્યાન રાખવું જોઈએ કે, પોતાના બાળકોને આવા ખીચોખીચ ભરેલા વાહનોમાં બેસાડીને શાળાએ મોકલવા ન જોઈએ.
આ પણ વાંચો: રાજકોટ RTO દ્વારા ઓનલાઈન સેવા શરૂ, કચેરીએ અરજદારોની ભીડ નહિવત
આ પણ વાંચો: રાજકોટ RTO નજીક રેડિયમ નંબર પ્લેટના ધંધાર્થીની હત્યા, પોલીસ તપાસ શરૂ
