યુનિવર્સિટી માટી કૌભાંડ અંગે રજિસ્ટ્રારએ કહ્યું, 'મારુ કામ માટીના ફેરા ગણવાનું નથી'

સૌરાષ્ટ્ર યુનિવર્સિટી( Saurashtra University )માં વિવાદો બંધ થવાનું નામ જ નથી લઈ રહ્યા, ત્યારે ફરી એકવાર યુનિવર્સિટીમાં માટી કૌભાંડ ( Soil Scam ) સામે આવ્યું છે. જેમાં, ટ્રેક્ટરના ફેરા સહીતના કુલ કામના અંદાજીત 7 લાખથી વધુના બોગસ બિલ મંજુર કરાવવા માટે મૂકવામાં આવતા ઓડિટ વિભાગ દ્વારા પકડી પાડવામાં આવ્યું છે. આ બાબતે સમગ્ર આરોપ યુનિવર્સિટીના ઇન્ચાર્જ રજિસ્ટ્રાર જતીન સોની ( Registrar Jatin Soni )પર કરવામાં આવી રહ્યો છે. આથી, ETV Bharatએ તેમની સાથે વાતચીત કરી હતી.

• માટી કૌભાંડ મામલે NSUI દ્વારા કુલપતિને રજૂઆત
• યુનિવર્સિટીના સ્પોર્ટ્સ સંકુલમાં આ માટી કૌભાંડ સામે આવ્યું
• 7 લાખથી વધુનું બોગસ બિલ મંજુર કરાવવા માટે મૂકવામાં આવ્યું

રાજકોટ: સૌરાષ્ટ્ર યુનિવર્સિટી ( Saurashtra University ) માં સામે આવેલા બહુચર્ચિત માટી કૌભાંડ મામલે આજે સોમવારે રાજકોટ NSUI દ્વારા કુલપતિને રજૂઆત કરવામાં આવી હતી. આ માટી કૌભાંડ ( Soil Scam )મામલે તાત્કાલિક ધોરણે કાર્યકારી રજિસ્ટ્રાર જતીન સોની ( Registrar Jatin Soni )ને હોદ્દા ઉપરથી દૂર કરવાની માંગ કરવામાં આવી હતી, જ્યારે NSUI દ્વારા યુનિવર્સિટીમાં હોબાળો મચાવવામાં આવતા પોલીસ દ્વારા આ તમામ NSUIના કાર્યકર્તાઓની અટકાયત કરવામાં આવી હતી. સૌરાષ્ટ્ર યુનિવર્સિટીના સ્પોર્ટ્સ સંકુલમાં આ માટી કૌભાંડ સામે આવ્યું છે. જેમાં બોગસ બિલો બનાવીને તેને પાસ કરવાની ઘટનાનો પર્દાફાશ થયો છે.

આ પણ વાંચો: સૌરાષ્ટ્ર યુનિવર્સિટીના સ્પોર્ટ્સ કોમ્પ્લેક્સમાં 7.50 લાખનું ખોટું બિલ મૂકી કૌભાંડ આચાર્યુ

રજિસ્ટ્રાર તરીકે મારુ કામ ટ્રેક્ટરના ફેરા ગણવાનું નથી

સૌરાષ્ટ્ર યુનિવર્સિટીમાં સામે આવેલા માટી કૌભાંડ મામલે એવી પણ ચર્ચા છે કે, યુનિવર્સિટીના ઇન્ચાર્જ રજિસ્ટ્રાર જતીન સોનીની આ કૌભાંડમા મુખ્ય ભૂમિકા હોવાના આક્ષેપો કરવામાં આવ્યા છે, ત્યારે ETV Bharat દ્વારા જતીન સોની સાથે આ મામલે વાત કરવામાં આવી હતી. આ બાબતે તેમણે સ્પષ્ટપણે જણાવ્યું હતું કે, મારું નામ જાણી જોઈને વિવાદમાં લાવવામાં આવી રહ્યું છે. મારે આ પ્રકારના કોઈ પણ કૌભાંડ સાથે કંઈ લેવાદેવા નથી. હું રજિસ્ટ્રાર તરીકે મારું કામ કરું કે ગ્રાઉન્ડમાં જઈને ટ્રેક્ટરના ફેરા ગણું ?, મને જાણીજોઈને બદનામ કરવામાં આવી રહ્યો છે.

રિપોર્ટ આવ્યા બાદ થશે કાર્યવાહી

સૌરાષ્ટ્ર યુનિવર્સિટીમાં જે પ્રકારની હાલ ગેરનીતિ સામે આવી છે. જેને લઇને અમે તાત્કાલિક આ કામમાં તપાસ માટેની ટીમની રચના કરી છે. આ ટીમ દ્વારા અમને 15 દિવસમાં સમગ્ર તપાસ બાદ રિપોર્ટ આપવામાં આવશે. તેમજ આ રિપોર્ટના આધારે અમે આગળની કાર્યવાહી કરશું. આ મામલે જરૂર પડે તો કાયદેસરની કાર્યવાહી પણ કરીશું. - ડો. નીતિન પેથાણી ( કુલપતિ, સૌરાષ્ટ્ર યુનિવર્સિટી )

આ પણ વાંચો: રાજકોટના પાણીના પાઉચની આડમાં દેશી દારૂનું વહેંચાણ

ઓડિટ વિભાગ દ્વારા સમગ્ર કૌભાંડનો કરાયો પર્દાફાશ

સૌરાષ્ટ્ર યુનિવર્સિટીના સ્પોર્ટ્સ સંકુલમા સુંદરતા વધારવા માટે અહીં માટીનું કામ કરવામાં આવ્યું હતું, જ્યારે એક ટ્રેક્ટર માટી નાખવાના રૂ. 200નું ચુકવણું કરવામાં આવ્યું હતું. આમ કુલ 900 કરતાં વધુ ટ્રેક્ટરના ફેરા થયા હતા. આમ, ટ્રેક્ટરના ફેરા સહીતના કુલ કામના અંદાજીત રૂ.7 લાખથી વધુનું બોગસ બિલ મંજુર કરાવવા માટે મૂકવામાં આવ્યું હતું. જેને ઓડિટ વિભાગ દ્વારા પકડી પાડવામાં આવ્યું છે. ત્યારબાદ આ સમગ્ર મામલો બહાર આવ્યો હતો. આ કામમાં જે ટ્રેક્ટરનો ઉપયોગ થયો છે તે, ટ્રેક્ટરના નંબર પણ બિલમાં ખોટા લખવામાં આવ્યા હોવાનું સામે આવ્યું છે. જેને લઇને સૌરાષ્ટ્ર યુનિવર્સિટી ફરી એકવાર વિવાદોમાં સપડાઈ છે.