55 દિવસ બાદ શરૂ થયેલી STને થઈ રહી છે ખૂબ મોટી આર્થિક નુકશાની

લૉકડાઉનના ચોથા તબક્કામાં સરકારે એસટીનું સંચાલન શરુ કર્યું છે. ત્યારે લૉકડાઉન સમયમાં બંધ રહેલાં તંત્રને કેટલું નુકસાન થયું તેના જિલ્લાવાર આંકડાઓ સામે આવી રહ્યાં છે. જૂનાગઢ જિલ્લાની વાત કરીએ તો એસટી વિભાગને મોટી આર્થિક નુકસાની સહન કરવાનો વારો આવ્યો છે.

જૂનાગઢ: કોરોના વાઇરસ અને તેના બાદ લાદવામાં આવેલા lock down ને લઈને 55 દિવસ સુધી જૂનાગઢ એસટી વિભાગની તમામ બસોનું સંચાલન સ્થગિત કરવામાં આવ્યું હતું ત્યારે ગઇકાલે ચોથા તબક્કામાં કેટલીક છૂટછાટો મળતાં એસ.ટી વિભાગ દ્વારા જૂનાગઢ જિલ્લાની મર્યાદામાં એસટી બસોનું સંચાલન ફરી શરૂ કરવામાં આવ્યું છે. પ્રથમ દિવસે 53 શિડ્યૂલની બસોની 260 ટ્રીપ થઈ હતી. આ દરમિયાન 12,469 કિલોમીટર બસોને ચલાવવામાં આવી હતી. જેમાં એસટી નિગમને 44,636 જેટલી આવક થઈ હતી. ગઈકાલે એક દિવસના સંચાલનમાં જૂનાગઢથી કેશોદ માંગરોળ સહિતના તાલુકામાં 1,424 જેટલા પ્રવાસીઓએ એસટી બસમાં પ્રવાસ કર્યો હતો.

જેની સરખામણીમાં સામાન્ય દિવસોની વાત કરીએ તો જૂનાગઢ એસટી ડિવિઝન નીચે આવતાં અંદાજિત 500 કરતાં વધુ રૂટો 22 કલાક માટે સંચાલનમાં હોય છે. જેના થકી એસટી વિભાગને એક દિવસમાં અંદાજિત 40 લાખ કરતા વધુની આવક થતી હોય છે ત્યારે ગઈકાલે સરકાર દ્વારા જે આદેશો જાહેર કરવામાં આવ્યાં છે તેને લઈને એસટી સેવાને પૂર્વવત કરવાનો પ્રયાસ કરવામાં આવી રહ્યો છે. પરંતુ જે પ્રકારે પ્રવાસીઓની સંખ્યા છે તે જોતાં વિભાગને બસના સંચાલન દરમિયાન થતી આવક વધુ નુકશાન તરફ દોરી જાય તેવા સંજોગો જોવાઈ રહ્યાં છે.

55 દિવસ બાદ શરૂ થયેલી એસટીને થઈ રહી છે ખૂબ મોટી આર્થિક નુકશાની