ગુજરાત હાઈકોર્ટની ટકોર અને કોરોનાના કારણે આ વખતે નહીં યોજાય પતંગ મહોત્સવ

રાજ્યમાં દિવાળી બાદ કોરોના સંક્રમણમાં વધારો થયો હતો. અમદાવાદ, રાજકોટ, સુરત અને વડોદરામાં દિવસેને દિવસે કેસમાં સતત વધારો થઈ રહ્યો હતો. આ પરિસ્થિતિ કાબૂ બહાર હતી પરંતુ રાજ્ય સરકારે તાત્કાલિક ધોરણે રાત્રે કર્યું મૂકીને પરિસ્થિતિને કન્ટ્રોલમાં કરી છે તે બાબતે ગુજરાત હાઈકોર્ટે પણ સરકારના લીધેલ પગલા બાબતે સારૂ વલણ દાખવ્યું છે. જ્યારે પતંગ મહોત્સવ આ બાબતે પણ રાજ્ય સરકારને ટકોર કરી હતી ત્યારે હવે રાજ્ય સરકારે અમદાવાદમાં યોજવામાં આવતો આંતરરાષ્ટ્રીય કાઈટ ફેસ્ટિવલ પણ રદ કરવાનો નિર્ણય કર્યો છે..

• કોવિડ 19ની અસર પતંગ મહોત્સવમાં આવી
• સરકારે તમામ પતંગ મહોત્સવમાં રદ કર્યા
• હાઈકોર્ટની સૂચના બાદ રાજ્ય સરકારે લીધો નિર્ણય
• ઉત્તરાયણ બાબતે બહાર પાડવામાં આવશે એસઓપી

ગાંધીનગર: રાજ્ય સરકારના નિર્ણય બાબતે સૂત્રોમાંથી મળતી માહિતી પ્રમાણે, રાજ્યમાં આ વર્ષે પતંગ મહોત્સવની ઉજવણી નહીં કરવામાં આવે. રાજ્ય સરકાર દ્વારા ખૂબ નિયંત્રણ વર્તમાન સમયમાં કરવામાં આવી રહ્યું છે. આ ઉપરાંત જો પતંગ મહોત્સવ થાય તો સોશિયલ ડિસ્ટન્સના ધજાગરા ઉડે તેવી પરિસ્થિતિ પણ ઉત્પન્ન થાય આમાં આવી પરિસ્થિતિને ધ્યાનમાં રાખીને જ રાજ્ય સરકારે પતંગ મહોત્સવ નહીં યોજવાનો નિર્ણય કર્યો છે.

ઉત્તરાયણમાં પોલીસને કામમાં ભારણ થશે

અમદાવાદ, રાજકોટ અને સુરત શહેરમાં 14 જાન્યુઆરીએ ઉત્તરાયણ હર્ષોલ્લાસ સાથે ઉજવવામાં આવે છે. પરંતુ આ વર્ષે કોરોનાના કારણે ધાબા ઉપર વધુમાં વધુ લોકો ભેગા ન થાય તે બાબતે પણ રાજ્ય સરકાર ખાસ એસઓપી જાહેર કરે તેવી પણ શક્યતા દર્શાવવામાં આવી રહી છે. આમ, જો રાજ્ય સરકાર નવી એસઓપી ફક્ત ઉત્તરાયણના તહેવારને ધ્યાનમાં લઈને જ જાહેર કરશે તો પોલીસના કામમાં પણ વધશે પોલીસને ધાબા ઉપર જઈને ચેકિંગ કરવાની પણ ફરજ પડશે.

પતંગ બજારમાં પણ કોરોનાનું ગ્રહણ નડશે

કોરોના સંક્રમણ વધુ ન ફેલાય તે માટે રાજ્ય સરકાર દ્વારા અમદાવાદ, રાજકોટ સુરત અને બરોડામાં રાત્રે 9થી સવારના 6 વાગ્યા સુધી કર્ફ્યૂ જાહેર કર્યું છે ત્યારે આ કર્ફ્યૂની અસર પતંગ બજારમાં પણ જોવા મળશે. ઉલ્લેખનીય છે કે, પતંગ બજારમાંથી પતંગની ખરીદી માટે લોકો રાત્રિના સમયે જ જવાનું પસંદ કરે છે, પરંતુ આ વર્ષે કોરોનાના કારણે રાત્રિ કર્ફ્યૂ લાદવામાં આવ્યું છે. આને ધ્યાનમાં લઈને પતંગ બજારમાં પણ રાત્રે કોઈ ખરીદી કરવા નહીં જઈ શકે.