ગાંધીનગર : રાજ્યમાં કોરોના વાઈરસે હાહાકાર મચાવ્યો છે. જ્યારે મેડિકલ અને પેરામેડિકલ સ્ટાફની પણ રાજ્યમાં અછત છે. તે દરમિયાન જૂનાગઢના 4 ડૉક્ટરોએ રાજીનામું આપી દીધું હતું. તે ઘટનાને ધ્યાનમાં લઈને હવે રાજ્યના આરોગ્ય વિભાગ દ્વારા કડક વલણ અપનાવવામાં આવ્યું છે. હવેથી રાજ્યના કોઈપણ ડોક્ટર કે આરોગ્ય વિભાગના કર્મચારીઓનું રાજીનામું સ્વીકારવામાં નહીં આવે.
રાજ્યના આરોગ્ય પરિવાર અને કલ્યાણ વિભાગ દ્વારા આજે એક પરિપત્ર બહાર પાડવામાં આવ્યો હતો. જેમાં રાજ્યની સરકારી હોસ્પિટલોમાં ફરજ બજાવતા ડોક્ટર અને પેરામેડિકલ સ્ટાફના કર્મચારીઓ રાજીનામું નહીં આપી શકે. જો કોઈપણ અધિકારી કે કર્મચારી રાજીનામું આપશે તો રાજીનામું સ્વીકારવામાં આવશે નહીં.
આ ઉપરાંત વર્તમાન પરિસ્થિતિમાં જે પણ ડોક્ટરો અને પેરામેડિકલ સ્ટાફ રજા ઉપર છે તેઓને પણ તાત્કાલિક રજા રદ કરીને ફરજ પર બોલાવવાની સૂચના આપવામાં આવી છે. જો આવા અધિકારી અને કર્મચારીઓ ફરજ પર હાજર ન રહે તો તેમના વિરુદ્ધ કડક કાયદેસરની કાર્યવાહી કરવાની પણ સૂચના આરોગ્ય વિભાગ દ્વારા આપવામાં આવી છે.
ઉલ્લેખનીય છે કે, જૂનાગઢના 5 સરકારી ડોક્ટરોના રાજીનામા બાદ હવે રાજ્ય આરોગ્ય વિભાગ કડક બન્યું છે. આ ઉપરાંત જે રીતે ગુજરાતમાં કોરોનાના કેસ વધતા જાય છે, તેને ધ્યાનમાં લઇને હજુ પણ વધુ મેડિકલ અને પેરામેડિકલના સ્ટાફની જરૂર પડે તેવું લાગી રહ્યું છે.
