- અમદાવાદ એરપોર્ટમાં કોવિડ ગાઇડ લાઇન્સના પાલન માટે ઉભી કરાઇ સિસ્ટમ
- 4 કસ્ટમર કેર એઝ્કિયુટીવ ઓફિસરને આપી ગ્રાઉન્ડની જવાબદારી
- 10 કોરોના ટેસ્ટ માટેના કાઉન્ટર ઉભા કરાયા
અમદાવાદ: ગુજરાતમાં દિવસેને દિવસે કોરોનાનો કહેર જોવા મળી રહ્યો છે. રાજ્યના આરોગ્ય વિભાગના આંકડા પ્રમાણે છેલ્લા 24 કલાકમાં 93 લોકોના નિધન થયા છે ત્યારે અમદાવાદ એરપોર્ટની વાત કરવામાં આવે તો, કોરોના વિદેશથી ગુજરાતમાં પ્રવેશે નહી તે માટે ખાસ વ્યવસ્થા કરવામાં આવી છે. સુત્રો તરફથી મળતી માહિતી પ્રમાણે અમદાવાદ ડોમેસ્ટીક અને આંતરરાષ્ટ્રીય એરપોર્ટ પર કુલ-20 જેટલા RT-PCR સેન્ટર ઉભા કરવામાં આવ્યા છે. આમ, આંતરરાષ્ટ્રીય એરપોર્ટ પર 10 અને ડોમેસ્ટીક એરપોર્ટ પર 10 કાઉન્ટર કોરોના ટેસ્ટિંગ માટે ઉભા કરવામાં આવ્યા છે.
આ પણ વાંચો: સુરત એરપોર્ટ પર કોરોના ટેસ્ટિંગ અને કસ્ટમ ચેકિંગને લઇ અવ્યવસ્થાના દૃશ્યો સર્જાયા
RT-PCR ટેસ્ટ માટે હવે ઓનલાઇન સિસ્ટમ આવશે
વર્તમાન સમયમાં કોઇ પણ વ્યક્તિ અમદાવાદ આંતરરાષ્ટ્રીય એરપોર્ટ પર આવે તો ફોર્મ ભરીને RT-PCR ટેસ્ટ કરવામાં આવી રહ્યા છે. જેમાં પેસેન્જરે ફરજિયાત ફોર્મ ભરવું પડે છે. જેથી સમયનો બગાડ અને વધુ પ્રમાણમાં ભીડ થતી હોય છે, ત્યારે હવે એરપોર્ટ દ્વારા ટૂંક સમયમાં સિસ્ટમને હટાવીને ઓનલાઇન સિસ્ટમ કરવામાં આવશે. જેથી પેસેન્જરે ઓનલાઇન ફોર્મ ભરીને ગણતરીની મિનિટોમાં જ RT-PCR ટેસ્ટ કરાવીને ઘરે જઇ શકશે. જેમાં પેસેન્જરે ફરજિયાત 7 દિવસ સુધી ક્વોરેન્ટાઈન રહેવું પડશે અને જો ટેસ્ટ પોઝિટિવ આવશે તો કોર્પોરેશન દ્વારા તેમને જાણ કરીને ટ્રીટમેન્ટ શરૂ કરવામાં આવશે.
CCTV નેટવર્કથી થઇ રહ્યું છે સર્વેલન્સ
અમદાવાદ એરપોર્ટની વાત કરવામાં આવે તો કોવિડ-19ના નિયમો પ્રમાણે સોશિયલ ડિસ્ટન્સ, માસ્ક અને સેનિટાઇઝર ફરજિયાત છે, ત્યારે આ તમામ બાબતોની ચોક્સાઇ CCTVના માધ્યમથી દેખરેખ કરવામાં આવી રહી છે. આ ઉપરાંત જો કોઇ જગ્યા પર વધુ પ્રમાણમાં પેસેન્જરો ભેગા થઇ જાય તો તેવી ભીડને દૂર કરવા માટે એરપોર્ટ પર ખાસ કસ્ટમર સર્વિસ એક્ઝિક્યુટીવને ફરજ પર રાખવામાં આવ્યા છે અને તેઓને ફક્ત સોશિયલ ડિસ્ટન્સ જળવાઇ રહે તે ફરજ આપવામાં આવી છે. જ્યારે અમદાવાદ આંતરરાષ્ટ્રીય એરપોર્ટ પર 10 મિનિટના અંતરે કોવિડ-19ની ગાઇડ લાઇન્સની પણ વારંવાર જાહેરાત કરવામાં આવી રહી છે.
આ પણ વાંચો: દિલ્હી એરપોર્ટ પર આજે બુધવારથી રેન્ડમ કોવિડ ટેસ્ટ શરૂ
એરપોર્ટ પર 150 સેનિટાઇઝર મશીન
સુત્રો તરફથી મળતી માહિતી પ્રમાણે અમદાવાદ આંતરરાષ્ટ્રીય એરપોર્ટ પર 150 જેટલા હેન્ડ સેનિટાઇઝર મશીન મૂકવામાં આવ્યા છે. જે સેન્સર વાળા હોવાનું સામે આવ્યું છે. જ્યારે બાથરૂમની અંદર પણ પાણીના નળ અને હેન્ડ વોશિંગ સિસ્ટમ પણ સેન્સર યુક્ત કરવામાં આવ્યા છે. જેથી કોઇ પણ પ્રવાસી એરપોર્ટની વસ્તુને અડી ન શકે. જ્યારે એરપોર્ટના ફર્શ પર પણ સોશિયલ ડિસ્ટન્સના સ્ટિકર લગાવવામાં આવ્યા છે.
