નવી દિલ્હી: કોંગ્રેસ અધ્યક્ષ સોનિયા ગાંધીએ શુક્રવારે વડાપ્રધાન નરેન્દ્ર મોદીને દેશના તમામ રાજ્યો અને કેન્દ્ર શાસિત પ્રદેશોમાં તબીબી શૈક્ષણિક સંસ્થાઓમાં ઓબીસી અનામતનું પાલન સુનિશ્ચિત કરવા તાકીદ કરી છે. તેમણે વડા પ્રધાન મોદીને લખેલા પત્રમાં જણાવ્યું હતું કે NEET દ્વારા તબીબી સંસ્થાઓમાં પ્રવેશના સંદર્ભમાં ઓબીસી વિદ્યાર્થીઓને આરક્ષણની સુવિધા નથી મળી રહી.
સોનિયા ગાંધીએ કહ્યું કે, 'અખિલ ભારતીય કોટા હેઠળ તમામ કેન્દ્રિય અને રાજ્ય મેડિકલ શૈક્ષણિક સંસ્થાઓમાં અનુસૂચિત જાતિ, અનુસૂચિત જનજાતિ અને આર્થિક નબળા વર્ગ માટે અનુક્રમે 15, 7.5 અને 10 ટકા બેઠકો અનામત રાખવામાં આવે છે. જો કે, ઓલ ઇન્ડિયા કોટા હેઠળ OBC વિદ્યાર્થીઓ માટે અનામત ફક્ત કેન્દ્રીય સંસ્થાઓ સુધી મર્યાદિત છે.
કોંગ્રેસના એક નેતાએ કહ્યું કે 'ઓલ ઈન્ડિયા ફેડરેશન ફોર અધર બેકવર્ડ ક્લાસેસ ' દ્વારા એકત્રિત કરવામાં આવેલા આંકડા મુજબ, રાજ્યો અને કેન્દ્રશાસિત પ્રદેશોમાં તબીબી શિક્ષણ સંસ્થાનોમાં ઓબીસી અનામત લાગુ ન થતા 2017 બાદથી 11,000 બેઠકો ગુમાવી છે. તેમના મતે, રાજ્યની તબીબી સંસ્થાઓમાં ઓબીસી અનામતની મંજૂરી ન આપવી એ 93 મી બંધારણીય સુધારાનું ઉલ્લંઘન છે તેથી મેડિકલ શિક્ષણ મેળવવા માટે લાયક ઓબીસી વિદ્યાર્થીઓન વંચિત રહી જાય છે.
કોંગ્રેસ અધ્યક્ષે કહ્યું કે, "સમાનતા અને સામાજિક ન્યાયના હિતમાં, હું કેન્દ્ર સરકારને વિનંતી કરું છું કે મેડિકલ અને ડેન્ટલમાં અખિલ ભારતીય કોટા હેઠળ રાજ્યો અને કેન્દ્રશાસિત પ્રદેશોની તબીબી સંસ્થાઓમાં ઓબીસી વિદ્યાર્થીઓને અનામત આપવામાં આવે.
