નવી દિલ્હીઃ ગત 29 મે ના રોજ દિલ્હી પોલીસના એક હવલદાર ભીર સિંહનો કોરોના રિપોર્ટ પોઝિટિવ આવ્યો હતો. તેમના નિધન સાથે હવે 10 પોલીસ જવાનો કોરોનાને કારણે મોતને ભેટ્યા છે.
દિલ્હીમાં ફ્રન્ટ લાઈન કોરોના વોરિયર્સ ગણાતા પોલીસ જવાનો ઝડપથી કોરોનાથી સંક્રમિત થઈ રહ્યાં છે. અત્યાર સુધી દિલ્હીમાં 2079 પોલીસ જવાનો કોરોનાથી સંક્રમિત થયા છે.
47 વર્ષીય હવાલદાર ભીર સિંહ દિલ્હી પોલીસની પીસીઆર વાનમાં ડ્યુટી પર તૈનાત હતા. તેમણે 29 મે એ તેમનો કોરોના રિપોર્ટ કઢાવ્યો હતો. જે પોઝિટિવ આવ્યો હતો. મંગળવારે તેમની તબિયત બગડતાં પરિવારજનો તેમને લેડી હર્ડિંગ હોસ્પિટલ લઈ ગયા હતા. જ્યાં તેમનું નિધન થયું હતું.
દિલ્હી પોલીસના 2 હજારથી વધુ જવાનો કોરોનાથી સંક્રમિત છે ત્યારે બીજી તરફ એક હજાર જેટલા જવાનો સ્વસ્થ પણ થયા છે. તેમ છતાં આ કોરોના વોરિયર્સના માથે તોળાઈ રહેલું કોરોનાનું જોખમ ચિંતાનો વિષય છે.
