રાજકોટ: ઉપલેટા શહેરમાં વર્ષ 2021માં સગી કાકી દ્વારા એક 10 વર્ષની માસુમ બાળકીના માથાના ભાગે દસ્તાના ઘા ઝીંકી કરપીણ હત્યા કરવાના આરોપની અંદર મુખ્ય આરોપી તરીકે જેમનું નામ હતું. એ માસુમ બાળકીની સગી કાકી તેમજ પુરાવાઓનો નાશ કરી મદદગારી કરવાના આરોપમાં સામેલ બાળકીના સગા કાકા અને પિતાને ધોરાજીની સેશન્સ કોર્ટમાં નિર્દોષ છુટકારો થયો છે. જેમાં આ કેસમાં રોકાયેલા વકીલોની દલીલો તેમજ ઉચ્ચ અદાલતના ચુકાદાઓને ગ્રાહ્ય રાખી ધોરાજી સેશન્સ કોર્ટ દ્વારા બાળકીની સગી કાકી-કાકા અને પિતાનો નિર્દોષ છુટકારો થયો હોવાનું સામે આવ્યું છે.
શું છે સમગ્ર ઘટના: આ કેસની પ્રાપ્ત વિગતો અનુસાર ઉપલેટામાં તારીખ 08-06-2021ના રોજ આયુષી નામની એક 10 વર્ષની બાળકીને દેરાણી જેઠાણીના કંકાશનો ભોગ બનવો પડ્યો હતો. જેમાં આ ઘરકંકાશને કારણે કાકીએ 10 વર્ષની માસુમ બાળકીના માથાના ભાગે દસ્તાના ઘા ઝીંકી હત્યા કરી નાખી હોવાનો આરોપ લગાવવામાં આવ્યો હતો. જે બાદ તે જાતે દવાખાને લઈ ગઈ હતી અને આ બાળકી સીડી પરથી પડી ગઈ હોવાની કહાની કાકીએ ઉપજાવી કાઢી હતી. આ બાદ આ મૃત બાળકીના પોસ્ટમોર્ટમ કરાવ્યા વગર અંતિમ સંસ્કાર કરી નાખવામાં આવતા સમગ્ર બાબતે ભારે ચકચાર મચી ગઈ હતી. આ ઘટનામાં હત્યાના ગુનાની અંદર બાળકીની સગી કાકી તેમજ પુરાવાઓનો નાશ કરી મદદ કરવાના આરોપસર પોલીસે બાળકીના પિતા અને બાળકીના કાકાની ધરપકડ કરી હતી.
ધોરાજી સેશન્સ કોર્ટે આપ્યો ચુકાદો: ઉપલેટાના નિમાવત પરિવારના ચેતન નિમાવત અને મયુર નિમાવતની પણ ધરપકડ કરવામાં આવી હતી. જેમાં આ કેસની અંદર હત્યાના બનાવમાં ત્રણેય વ્યક્તિઓની ધરપકડ કરવામાં આવી હતી. જે બાદ મૃતક બાળકી આયુષીના સગા કાકા અને પિતાનો થોડા સમયની અંદર જામીન ઉપર છુટકારો થયો હતો. જે બાદ આ ચકચારીત હત્યા અંગેનો કેસ ધોરાજીની સેશન્સ કોર્ટમાં ચાલી જતાં ધોરાજી સેશન્સ કોર્ટે આ ચુકાદો આપ્યો છે.
લોખંડના દસ્તાથી ઘા ઝીંક્યા: આરોપ હતો કે ઉપલેટા શહેરની સર્વોદય સોસાયટીમાં સંયુક્ત કુટુંબની અંદર દેરાણી જેઠાણી વચ્ચે ચાલતી નાની મોટી તકરારને લઈને 10 વર્ષની સગીર વયની બાળકી આયુષીની કાકીએ બદલો લેવાના હેતુસર જેઠાણીની માસુમ પુત્રી રૂમમાં ટીવી જોતી હતી ત્યારે તેને કંઈક વસ્તુ આપું તેમ કહીને મકાનની છત ઉપર લઈ ગઈ હતી. જે બાદ આ આયુષીને બ્લેન્કેટમાં સુવડાવી માથાના ભાગે લોખંડના દોસ્તાના ઘા ઝીકતા આયુષી લોહી લુહાણ થઈ ગઈ હતી અને તેનું મૃત્યું થયુંં હતું. જે બાદ આ મૃતક આયુષીને ઢસેડીને પગથિયા પરથી નીચે મૂકી દઈ આયુષીની મમ્મીને બોલાવી આયુષી પગથિયેથી પડી જતા ઈજા થઈ હોવાની ખોટી કહાની ઊભી કરી હતી.
પુરાવાનો કર્યો નાશ: આ ઘટના બાદ આયુષીને દવાખાને લઈ જવામાં આવી હતી. જ્યાં આયુષીનું મૃત્યુ થયું હોવાનું ડોક્ટરે જાહેર કર્યું હતું. ત્યારે આ મૃતક આયુષીના પિતા તથા કાકાને હત્યા થઈ હોવાની શંકા જતા આ મૃત આયુષીનું પોસ્ટમોર્ટમ ન કરાવી તેમજ અગાસી પરના લોહીના નિશાનો અને લોહીવાળો બ્લેન્કેટ પાણીથી ધોઈ નાખી ઘરની વાત ઘરમાં રહે તેવા ઈરાદાથી પુરાવાનો નાશ કર્યો હોવાનું પણ સામે આવ્યું હતું.
IPCની કલમો હેઠળ ગુનો નોંધાયો: આ બનાવની જાણ આયુષીના માતાને થતા આયુષીની માતાએ ઉપલેટા પોલીસ મથકમાં સમગ્ર બાબતે પોલીસ ફરિયાદ નોંધાવી હતી. જેમાં પોલીસ ફરિયાદ બાદ પોલીસ દ્વારા આઇપીસીની કલમ 302, 201 તેમજ 114 મુજબ પોલીસ ફરિયાદ દાખલ કરી હતી અને આ પોલીસ ફરિયાદ બાદ બાળકીની સગી કાકી તેમના પતિ અને બાળકીના સગા કાકાની ધરપકડ કરવામાં આવી હતી. ત્યારે આ મામલે ધરપકડ થઈ ગયા બાદ સમગ્ર મામલાનો કેસ ધોરાજીની સેશન કોર્ટમાં ચાલી રહ્યો હતો
આ કેસમાં મુખ્ય આરોપી તરીકે જેમનું નામ હતું. તેવી બાળકીની સગી કાકી વંદનાબેન મયુરભાઈ નિમાવત તરફે રોકાયેલ એડવોકેટ અરજણ સાગઠીયા તેમજ બાળકીના કાકા મયુરભાઈ હસમુખભાઈ નિમાવત અને બાળકીના પિતા ચેતનભાઇ હસમુખભાઈ નિમાવત તરફે રોકાયેલ એડવોકેટ અરવિંદ કાપડિયા દ્વારા બચાવ પક્ષે રોકાયેલ હતા. જેમાં આ કેસની અંદર આરોપીઓ તરફે રોકાયેલ વકીલોની ફરિયાદ પક્ષના શાહેદોની વિસ્તૃત ઉલટ તપાસમાં લેવામાં આવેલ હતી. ત્યારે આ સાથે જ સુનાવણી દરમિયાન ઉચ્ચ અદાલતના ચુકાદાઓના સિદ્ધાંતોને ટાંકી અને ધારદાર દલીલો પણ કરવામાં આવી હતી. જેમાં આ દલીલો અને ચુકાદાઓને ગ્રાહ્ય રાખી ધોરાજીના મહેરબાન એડિશનલ ડિસ્ટ્રિક્ટ એન્ડ સેશન્સ જજ અલીહુસેન મોહીબુલ્લાહ શેખ દ્વારા આ કેસમાં સામેલ બાળકીની સગી કાકી વંદનાબેન મયુરભાઈ નિમાવત તેમજ તેમના પતિ અને બાળકીના સગા કાકા મયુરભાઈ હસમુખભાઈ નિમાવત અને બાળકીના પિતા ચેતનભાઇ હસમુખભાઈ નિમાવતને નિર્દોષ ઠરાવી છોડી મૂકવાનો હુકમ ધોરાજી સેશન્સ કોર્ટ દ્વારા કરવામાં આવ્યો છે.
આ પણ વાંચો:
